Тошкент, Ўзбекистон (UzDaily.uz) — Тахтакўприк довони орқали тўловли тоннель қуриш бўйича келишувни имзолаш жорий йилга мўлжалланган. Бу ҳақда 11 июль куни Транспорт вазири Илҳом Маҳкамов “Ҳукумат соати” давомида депутатлардан бири томонидан берилган саволга жавобан маълум қилди.

Вазир таъкидлашича, Президентнинг Самарқанд ва Қашқадарё вилоятларига ташрифидан сўнг Транспорт вазирлигига Тахтакўприк довонида етти километрлик тўловли тоннель қуриш лойиҳасини амалга ошириш вазифаси юклатилган. Мазкур лойиҳа давлат-хусусий шериклик асосида, хусусий инвесторларни жалб қилган ҳолда амалга оширилади.

Маҳкамовнинг сўзларига кўра, ҳозирги вақтда учта компания лойиҳалаштириш ишлари билан шуғулланмоқда. Бироқ лойиҳани амалга ошириш бир қатор техник мураккабликлар билан боғлиқ — хусусан, геодезик ва геологик тадқиқотларни ўтказиш талаб этилмоқда. Ушбу жараёнлар маълум бир вақтни олганини таъкидлади вазир.

У маълум қилишича, хусусий инвесторлар томонидан зарур тадқиқотлар якунланган ва ҳозирги пайтда лойиҳанинг технико-иқтисодий асосини тайёрлаш босқичига ўтилган. Август ойида Транспорт вазирлиги Ўзбекистон манфаатларига мос келадиган мезонлар асосида уч номзод орасида ғолибни аниқлашни режалаштирган.

Маҳкамов қайд этдики, вазирлик жорий йил якунига қадар танловни якунлайди, ҳамкорни аниқлайди ва у билан Тахтакўприк орқали тўловли тоннель қуриш лойиҳасини амалга ошириш бўйича келишув имзолайди.

Ушбу лойиҳа 2024 йил август ойида тасдиқланган давлат-хусусий шерикликни 2030 йилгача ривожлантириш миллий дастури доирасига киритилган. Ҳужжатга мувофиқ, тоннель қурилиши учун сарфланадиган маблағ тахминан 100 миллион АҚШ долларига баҳоланган. 2024 йил охирига қадар тегишли идораларга стратегик ҳамкорлар билан музокаралар олиб бориш, 2025 йил августигача лойиҳа концепциясини тасдиқлаш, 2026 йил февралигача хусусий шерикни аниқлаш ва 2026 йил декабригача келишувни имзолаш вазифалари юклатилган.