Тошкент, Ўзбекистон (UzDaily.uz) — Қишлоқ хўжалиги вазири ўринбосари Қаҳрамон Юлдашев Хитойнинг “Shanghai Oriental Credits Industrial Development Co., Ltd ”(SINOMACH) компанияси вакиллари билан учрашди.

Унда Хитойнинг илғор технологияларидан фойдаланиш, қишлоқ хўжалигини рақамлаштириш, ер ресурсларини бошқаришда инновацион ёндашувларни жорий этиш ва юқори самарадорликка эришиш борасида муҳокама олиб борилди.

Учрашув аввалида бугунги кунда Ўзбекистон-Хитой муносабатлари тобора ривож топаётганлиги, айниқса пахтачилик, янги инновацион технологиялар соҳасида ўзаро ҳамкорлик алоқалари равнақ топаётганлиги айтиб ўтилди.

Ўз навбатида, "SINOMACH" компанияси вакиллари қишлоқ хўжалигини рақамлаштириш борасида "Agri Cloud" платформасига эгалигини, бу платформани Ўзбекистонда ҳам жорий қилиш борасида ўз таклифлари борлигини маълум қилишди ҳамда тақдимотларини ўтказишди.

Мазкур компания ички ва ташқи ресурсларини интеграциялаш, шунингдек, саноатнинг рақамли трансформациясини илгари суришга қаратилган стратегик янги саноат платформаси вазифасини бажаради. Компания “Agri Cloud” ва “Industry Cloud” лойиҳаларида иш олиб боради. Бу ўз навбатида саноат ривожланиш эҳтиёжларига қаратилган бўлиб, қишлоқ хўжалиги ва ишлаб чиқариш соҳалари учун ишончли маълумотлар базасини шакллантиришда хизмат қилади.

Мулоқот давомида қишлоқ хўжалиги соҳасида сунъий интеллектдан фойдаланишни янада кенгайтириш борасида ҳам муҳокамалар олиб борилди.

Учрашув якунида қишлоқ хўжалигини рақамлаштиришда Хитой тажрибасини ўрганиш, бу борада ишчи гуруҳ шакллантириш ҳамда таклифлар ишлаб чиққан ҳолда, мамлакатимизда ушбу платформани тажриба тариқасида йўлга қўйиш борасида келишиб олинди.