Тошкент, Ўзбекистон (UzDaily.uz) — Ўзбекистоннинг инвестициявий салоҳияти ва саноат соҳасидаги имкониятлари халқаро ҳамкорларни тобора кўпроқ жалб этмоқда. Шу кунларда Инвестициялар, саноат ва савдо вазирининг биринчи ўринбосари Н. Холмуродов бошчилигидаги «Ўзчармсаноат» уюшмаси делегацияси Хитой Халқ Республикасида қатор йирик компаниялар билан музокаралар олиб бормоқда.

Делегация аъзолари Хитойнинг чарм ва енгил саноат соҳасидаги етакчи компанияси саналган “Guojian Zhanmao (Putian) Supply Chain Co., Ltd.” бошқаруви раиси билан бўлиб ўтган учрашувда икки томонлама инвестициявий ҳамкорлик масалаларини муҳокама қилди.

Учрашув чоғида Хитой компаниясига Ўзбекистоннинг тўрт йирик ҳудуди — Бухоро, Навоий, Фарғона ва Самарқанд вилоятларида енгил саноат, хусусан чарм ва тўқимачилик маҳсулотлари ишлаб чиқаришга ихтисослашган замонавий саноат паркини барпо этиш таклифи илгари сурилди.

Хитой компаниясининг дастлабки режаларига кўра, 100 гектар ер майдонида 150 миллион долларлик лойиҳа амалга оширилиши кўзда тутилмоқда. Мазкур ташаббус нафақат ишлаб чиқаришни йўлга қўйиш, балки бутун ҳудуд учун марказлашган саноат хаби вазифасини бажариши режалаштирилган.

Шунингдек, лойиҳа доирасида саноат паркини барқарор энергия билан таъминлаш мақсадида қуёш панеллари ҳам ўрнатилиши белгиланган. Бу нафақат корхонанинг ички эҳтиёжини қондириш, балки ортиқча ҳажмни атрофдаги ташкилотларга етказиб бериш имконини ҳам яратади.

Шу тариқа, Хитой компанияси Ўзбекистонда амалга оширишни режалаштираётган лойиҳа нафақат чарм ва тўқимачилик тармоқларини қамраб олади, балки экологик жиҳатдан барқарор, янги авлод индустриал парки сифатида ҳам алоҳида аҳамият касб этади.

“Guojian Zhanmao (Putian) Supply Chain Co., Ltd.” раҳбарияти сентябрь ойида Ўзбекистонга бизнес миссия билан ташриф буюриб, лойиҳа бўйича ҳуқуқий ва техник шартларни мамлакат ҳукумати билан батафсил келишишини маълум қилди.

Ўзбекистон ва Хитой ўртасидаги саноат кооперацияси тобора мустаҳкамланмоқда. Янги саноат парки лойиҳаси иқтисодиётнинг муҳим тармоқларидан бири бўлган чарм ва тўқимачилик соҳасидаги қувватларни ошириш, ҳудудларда янги иш ўринлари яратиш ва мамлакатнинг экспорт салоҳиятини кенгайтиришга хизмат қилади.