Тошкент, Ўзбекистон (UzDaily.uz) — 29 август куни Ўзбекистон Савдо-саноат палатаси раиси ўринбосари Дилшод Расулов Хитой Халқ Республикасининг Шэньси провинцияси Таъминот ва савдо ҳамкорлик уюшмаси раиси Су Линьюань билан музокаралар ўтказди.

Учрашувда хитойлик ҳамкорлар Ўзбекистон-Хитой муносабатлари йиллар давомида ишончли ва барқарор асосда ривожланиб келаётганини таъкидлаб ўтишди. Шунингдек, Шэньси провинциясининг стратегик географик аҳамиятга эга экани, Буюк Ипак йўли айнан шу ҳудуддан бошлангани ва бунинг қишлоқ хўжалиги соҳасидаги ютуқлар учун муҳим омил сифатида хизмат қилаётгани қайд этилди.

Ўз навбатида, Д.Расулов Хитой Ўзбекистоннинг асосий савдо ҳамкорларидан бири эканлигини таъкидлаб, мамлакатимиз қишлоқ хўжалиги соҳасидаги имкониятлар, барқарор ривожланиш тенденциялари, тўғридан-тўғри инвестициялар ва экспорт-импорт йўналишидаги ўсиш кўрсаткичлари ҳақида маълумот берди.

Музокара давомида қишлоқ хўжалиги, қайта ишлаш саноати ва сифатли озиқ-овқат ишлаб чиқариш йўналишларида янги қўшма лойиҳаларни амалга ошириш имкониятлари муҳокама қилинди.

Якунда икки томонлама ҳамкорликнинг амалий аҳамиятга эга экани қайд этилди ва қишлоқ хўжалигини ривожлантириш, экспорт-импорт салоҳиятини ошириш ҳамда ўзаро манфаатли алоқаларни мустаҳкамлаш борасида янги босқичларга эришишга келишиб олинди.