Тошкент, Ўзбекистон (UzDaily.uz) — Ўзбекистон ва Хитой ўртасида ўзаро визасиз режим жорий этиш тўғрисидаги ҳукуматлараро битим ҳар икки давлатда зарур ички давлат процедуралари якунлангандан кейин кучга киради, деб хабар берди Ўзбекистон Ташқи ишлар вазирлиги.

2024 йилнинг 1 декабрь куни Ченду шаҳрида Ўзбекистон ва Хитой ташқи ишлар вазирлари Ўзбекистон Республикаси Ҳукумати билан Хитой Халқ Республикаси Ҳукумати ўртасида ўзаро визасиз режим тўғрисидаги битимни имзолади.

Мазкур ҳужжат Ўзбекистон Президенти ва Хитой Раиси ўртасида эришилган келишувга мувофиқ имзоланган.

Ўзбекистон Ташқи ишлар вазирлиги таъкидлашича, мазкур битим икки давлат фуқароларининг визасиз сафар қилиш тартибини белгилайди. Ҳужжат фуқароларга 30 кунгача бўлган муддатда кириш, чиқиш ёки транзитда визасиз ҳаракатланиш имконини беради.

Вазирлик қайд этишича, битим зарур ички давлат процедуралари тугаллангандан сўнг кучга киради.