Ўзбекистон ва Хитой электротехника саноатига қўшма инвестицияларни муҳокама қилишди

Тошкент, Ўзбекистон (UzDaily.uz) — Жорий йилнинг 23–27 март кунлари Хитой Халқ Республикасининг "C&D Emerging Energy" компанияси бош директор ўринбосари Ян Жие бошчилигидаги делегациянинг Ўзбекистонга ташрифи амалга оширилмоқда.

Ташриф доирасида 24 март куни «Ўзелтехсаноат» уюшмаси биносида уюшма бошқаруви раиси Мирзиёд Юнусов ҳамда "C&D Emerging Energy" компанияси бош директор ўринбосари Ян Жие ўртасида учрашув бўлиб ўтди.

Мулоқот давомида электротехника саноатини ривожлантириш, хусусан, кабель ва сим маҳсулотлари ишлаб чиқаришда кенг қўлланиладиган поливинилхлорид (ПВХ) ишлаб чиқаришни йўлга қўйиш бўйича истиқболли инвестиция лойиҳаларини амалга ошириш масалалари муҳокама қилинди.

Томонлар мазкур йўналишда ўзаро манфаатли ҳамкорликни кенгайтириш, илғор технологияларни жалб этиш ҳамда маҳаллий ишлаб чиқариш ҳажмини ошириш юзасидан фикр алмашдилар.

Учрашув якунида истиқболли лойиҳаларни амалий босқичга олиб чиқиш ҳамда келгусидаги ҳамкорликни изчил ривожлантириш бўйича биргаликда ишлашга келишилди.