Тошкент, Ўзбекистон (UzDaily.uz) — Жорий йилнинг 24 апрель куни Инвестициялар, саноат ва савдо вазирининг ўринбосари Илзат Касимов Хитой Халқ Республикасининг Цзянси провинцияси тадбиркорлар уюшмаси ижрочи раиси, Ғарбий Цзянси тадбиркорлар иттифоқи раиси, Цзянси вилояти савдо-саноат палатаси раиси Фан Юху бошчилигидаги делегация аъзолари билан музокаралар ўтказди.

Учрашувда Андижон вилоятининг Янги Андижон шаҳрида 55 гектар майдонда қиймати 250 миллион долларлик инвестиция лойиҳасини амалга ошириш истиқболлари муҳокама қилинди.

Лойиҳада 3000 дан ортиқ турар-жой хонадонлари, меҳмонхона, ресторанлар, савдо маркази ва аҳоли учун истироҳат боғи барпо этиш режалаштирилган. 500 та янги доимий иш ўринлари яратилиши кутилмоқда.