Ўзбекистон ва Уммон инвестиция ҳамкорлигини кенгайтириш масалаларини муҳокама қилишди

Тошкент, Ўзбекистон (UzDaily.uz) — 28 ноябрь куни Ўзбекистон Республикаси Инвестициялар, саноат ва савдо вазири Лазиз Кудратов UzOman инвестиция компаниясининг бош ижрочи директори Умар Бахрам билан учрашди.

Томонлар Ўзбекистон-Уммон инвестициявий ҳамкорлигининг изчил ривожланиб бораётганини ҳамда сўнгги йиллардаги ўзаро алоқаларнинг ижобий динамикасини қайд этдилар.

Суҳбат давомида UzOman иштирокида амалга оширилаётган лойиҳалар юзасидан фикр алмашилди, шунингдек, қўшма тадбирлар самарадорлигини ошириш ва амалий ташаббуслар кўламини кенгайтириш масалалари муҳокама қилинди.

Ўзаро ҳамкорлик томонлар учун янги лойиҳаларни ишга тушириш ва инвестицияларни жалб этишда қўшимча имкониятлар яратиши алоҳида таъкидланди.

Молиявий соҳадаги ҳамкорлик истиқболларига алоҳида эътибор қаратилди. Хусусан, хорижий ҳамкорлар билан биргаликда Ўзбекистонда янги банк ташкил этиш ташаббуси муҳокама қилинди. Лойиҳанинг ташкилий масалалари, тартибга солиш жиҳатлари ҳамда уни босқичма-босқич пухта ишлаб чиқиш зарурлиги таъкидлаб ўтилди.

Учрашув якунида томонлар мулоқотни мустаҳкамлаш, институционал алоқаларни кенгайтириш ва ҳамкорликнинг асосий йўналишлари бўйича конструк­тив ахборот алмашинувини давом эттиришга тайёрликларини билдирдилар.