Тошкент, Ўзбекистон (UzDaily.uz) — 

Ўзбекистоннинг Новосибирск шаҳридаги бош консули Аслам Акбаров Томск вилояти губернаторининг иқтисодиёт, инвестиция сиёсати ва мулкий муносабатлар бўйича ўринбосари Василий Потемкин билан музокара ўтказди, деб хабар қилмоқда "Дунё" АА мухбири.

Мулоқот чоғида Ўзбекистоннинг Россиянинг ушбу ҳудуди билан савдо-иқтисодий ҳамкорлигининг ҳолати, шунингдек, Томск вилояти губернатори Владимир Мазур бошчилигидаги делегациянинг шу йил ноябрь ойида юртимизга қилган ташрифи якунлари муҳокама қилинда.

Россия вакили Ўзбекистон Томск вилоятининг савдо-иқтисодий ва илмий-техникавий соҳаларидаги асосий шерикларидан бири эканлигини таъкидлади.

Василий Потемкиннинг айтишича, Томск вилояти губернатори бошчилигидаги делегациянинг республикага ташрифи якунлари нафақат мавжуд йўналишларни илгари суриш, балки узоқ муддатли истиқболга мўлжалланган иқтисодий шерикликнинг асосий жиҳатларини аниқлашда муҳим аҳамият касб этди.

Томск вилояти губернаторининг ўринбосари, шунингдек, В2В форматидаги учрашувлар чоғида эришилган келишувларга, хусусан, республикада термопластик полимер композициялари ишлаб чиқаришни йўлга қўйиш, "Томск электромеханика заводи" АЖ да ишлаб чиқарилган ускуналарни "Ўзкимёсаноат" АЖ ва бошқа корхоналарга етказиб бериш бўйича келишувларга эътибор қаратди.

Мулоқот чоғида вилоятдаги турли корхоналарига Ўзбекистондан мутахассисларни ишга жалб қилиш истиқболлари ҳам кўриб чиқилди.

 "Ўзбекистон вакиллари нафақат ҳудуднинг иқтисодий ривожланишига, балки икки давлат ўртасидаги ҳудудлараро ҳамкорлик жараёнига ҳам салмоқли ҳисса қўшмоқда", деди Василий Потемкин.

Мазкур масала юзасидан Россия томони ҳудуддаги тикувчилик ва тўқимачилик корхоналарига ишлаш учун Ўзбекистондан тажрибали тикувчиларни жалб қилиш зарурати борлигини маълум қилди.

Шунингдек, тажриба алмашиш ва истиқболдаги вазифаларни муҳокама қилиш мақсадида "Чирчиқ" саноат парки ва Сирдарё вилоятидаги саноат парки вакилларининг Томск шаҳрига ишчи сафарини ишлаб чиқиш бўйича келишувга эришилди.

Музокаралар якунида ҳар чоракда Томск вилояти раҳбарияти билан савдо-иқтисодий ва меҳнат миграцияси жабҳаларидаги биргаликдаги ишларнинг бориши юзасидан учрашув ўтказиш муҳимлиги қайд этилди.