Тошкент, Ўзбекистон (UzDaily.uz) — Ўзбекистон Ҳукумати Озарбайжоннинг Давлат нефть компанияси (SOCAR) билан маҳсулотни бўлишиш тўғрисидаги битим (МББ)ни имзолашга тайёрланмоқда. Бу ҳақда энергетика вазири Журабек Мирзамаҳмудов 21 июль куни мамлакат Президенти раҳбарлигида ўтказилган йиғилиш якунлари ҳақида «Ўзбекистон 24» телеканалига берган интервьюсида маълум қилди.

Йиғилиш чоғида Президент Шавкат Мирзиёев халқаро ҳамкорлар билан нефть-газ соҳасида амалга оширилаётган қўшма лойиҳалар юзасидан тақдимот билан танишди. Уларнинг асосий йўналишларидан бири SOCAR компанияси билан Устюрт минтақасида углеводородлар қазиб чиқариш ва разведка ишларини йўлга қўйиш бўлди.

Томонлар истиқболли участкаларда қўшма геология-қидирув ишларини олиб бориш ҳамда маҳсулотни бўлишиш тўғрисидаги битим тузиш юзасидан келишувга эришишди. Вазирнинг таъкидлашича, ушбу битим бўйича зарур ҳужжатлар пакети тайёргарлигининг якуний босқичига етиб келган. SOCAR билан МББни имзолаш шу ҳафта охирига режалаштирилган.

Президент Мирзиёев эришилган келишувларни жадал амалга ошириш, 2025 йил охиригача ва кейинги йиллар учун босқичма-босқич ҳаракатлар режасини ишлаб чиқиш ҳамда хорижий ҳамкорлар билан ҳамкорликда ортиқча бюрократик тўсиқларни бартараф этиш бўйича топшириқ берди.

«Ўзбекнефтгаз» компанияси бош директори Баҳодир Сидиқов битим лойиҳаси тайёрланганини, унинг асосий қоидалари SOCAR билан келишилганини ва Президент кўриб чиқиши учун тақдим этилганини тасдиқлади. Унинг сўзларига кўра, Озарбайжон томони билан МББ имзоланиши Ўзбекистоннинг нефть-газ соҳасини янада ривожлантириш учун янги истиқболларни очиб берадиган муҳим қадам бўлади.