Тошкент, Ўзбекистон (UzDaily.uz) — Россия Федерацияси Бош вазири ўринбосари Марат Хуснуллиннинг Тошкентга амалга оширган ишчи ташрифи доирасида Ўзбекистон ва Россия транспорт йўлакларини ривожлантириш истиқболларини муҳокама қилди.

Ташриф доирасида у Ўзбекистон Президенти Шавкат Мирзиёев билан музокаралар ўтказди, шунингдек, ишбилармон доира вакиллари билан бир қатор учрашувлар ўтказди.

Ишчи ташриф давомида ҳукумат раиси ўринбосари 2023 йилда очилган «Жиззах» технопаркига ташриф буюриб, бу ерда Ўзбекистон қурилиш индустрияси маҳсулотлар кўргазмаси билан танишди.

Шунингдек, вице-премьер «Ғалаба парки» мемориал мажмуасига ташриф буюриб, «Мардлик мадҳияси» ҳайкали пойига гулчамбар қўйди.

Учрашувларда асосий эътибор икки давлатни боғловчи транспорт инфратузилмасини ривожлантиришга, айниқса халқаро йўналишларга қаратилди.

Хусусан, томонлар Россия, Қозоғистон, Ўзбекистон, Афғонистон, Покистон ва Эрон орқали ўтувчи автомобил йўлаклари бўйича ҳамкорлик масалаларини кўриб чиқдилар.

Марат Хуснуллин бу транспорт тармоғини кенгайтириш стратегик аҳамиятга эга эканини таъкидлади ва уни ривожлантириш борасида қўшма ишларни давом эттиришга тайёрлигини билдирди.

Учрашувларда яна бир муҳим мавзулардан бири «Шимол-Жануб» халқаро транспорт йўлаги ривожига бағишланди. Мазкур йўлак Россия портларини Марказий Осиё, Яқин Шарқ ва Жанубий Осиё билан боғлашга қаратилган.

Вице-премьернинг таъкидлашича, ушбу лойиҳа савдо алоқаларини мустаҳкамлашда муҳим рол ўйнайди ва уни янада ривожлантириш талаб этилади.

«Шимол-Жануб» йўлаги Санкт-Петербург портларидан Ҳиндистоннинг энг йирик порти — Мумбайгача бўлган масофани қамраб олади ва унинг умумий узунлиги 7200 кмни ташкил этади.

Лойиҳа доирасида учта маршрут белгиланган: транскаспий (темир йўл ва денгиз транспортидан фойдаланган ҳолда), шунингдек, ғарбий ва шарқий (қуруқлик орқали) йўналишлар.

2024 йил май ойида Россия Президенти ёрдамчиси Игорь Левитин таъкидлаганидек, келгуси беш йил ичида «Шимол-Жануб» йўлагининг асосий йўналишлари қуйидагилар бўлади: ғарбий — Россия, Озарбайжон ва Эрон орқали; марказий — Каспий минтақаси орқали; шарқий — Қозоғистон, Ўзбекистон ва Туркманистонни қамраб олади.

Россия ва Ўзбекистон ўртасидаги савдо-иқтисодий ҳамкорлик мустаҳкамланишда давом этмоқда. 2024 йил якунларига кўра, ўзаро товар айирбошлаш ҳажми 5,2% га ўсиб, 10,2 миллиард долларга етди. Узоқ муддатли режаларга кўра, Москва ва Тошкент бу кўрсаткични 2030 йилга қадар 30 миллиард долларга етказишни мақсад қилган.