Тошкент, Ўзбекистон (UzDaily.uz) — 10 апрель куни Ўзбекистон Республикаси Инвестициялар, саноат ва савдо вазири ўринбосари Шоҳрух Гуламов Ҳиндистоннинг Reliance Industries компанияси бош директори Прасад Панда билан учрашди.

Reliance Industries 1966 йилда ташкил этилган ва Ҳиндистондаги энг йирик компаниялардан бири ҳисобланади. Компания раҳбари - Мукеш Амбани. Энергетика, нефть-кимё, савдо, телекоммуникациялар, рақамли технологиялар ва сунъий интеллект соҳаларида фаолият юритади. Компаниянинг активлари 300 миллиард долларни ташкил қилади.

Суҳбатда Ўзбекистонда йирик телекоммуникация тармоқларини бошқариш, рақамли инфратузилмани яратиш, юқори тезликдаги алоқа ва маълумотларни узатиш технологияларини жорий этиш йўналишларида истиқболли лойиҳаларни амалга ошириш имкониятлари муҳокама қилинди.

Иқтисодиётнинг тоғ-кон саноати ва энергетика соҳаларида амалга оширилаётган янги лойиҳаларга алоҳида эътибор қаратилди.

Учрашув якунлари бўйича томонлар муҳокама қилинган ташаббусларни ҳаётга татбиқ қилиш доирасида келгусидаги қўшма тадбирлар ва фаол ҳамкорлик механизмини келишиб олдилар.