Тошкент, Ўзбекистон (UzDaily.uz) — 16 февраль куни, Ўзбекистон Республикаси Президенти Шавкат Мирзиёевнинг Қувайтга расмий ташрифи олдидан, ушбу давлат пойтахтида Ўзбекистон-Қувайт бизнес-форуми бўлиб ўтди.

Форумда икки мамлакатнинг тегишли вазирлик ва идоралари, соҳавий уюшмалар раҳбарлари ҳамда 100 дан ортиқ йирик компания ва молиявий институтлар раҳбарлари иштирок этди.

Делегацияларга Ўзбекистон Республикаси инвестициялар, саноат ва савдо вазири Лазиз Қудратов ва Қувайт Савдо-саноат палатаси раҳбари Рабоҳ аль-Рабоҳ бошчилик қилди.

Форумни очар экан, Лазиз Қудратов сўнгги йилларда Ўзбекистон ва Қувайт ўртасидаги шерикликнинг изчил ривожланиб бораётганини таъкидлади. Қувайтнинг йирик компаниялари Ўзбекистонда соғлиқни сақлаш, қишлоқ хўжалиги, инфратузилма, меҳмонхона бизнеси, фармацевтика ва кўчмас мулк соҳаларида фаол инвестиция лойиҳаларини амалга оширмоқда.

Унинг қайд этишича, Ўзбекистонда хорижий инвесторлар учун энг қулай шароитлар яратилган: солиқ имтиёзлари жорий этилган, маъмурий тўсиқлар бартараф қилинган, кенг кўламли хусусийлаштириш дастури амалга оширилмоқда, ривожланган инфратузилмали бир неча ўнта эркин иқтисодий зоналар фаолият кўрсатмоқда, шунингдек, МДҲ ва ЕИ бозорларига божсиз кириш имконияти мавжуд.

Бу ислоҳотлар натижасида мамлакат иқтисодиёти сўнгги йилларда деярли икки баробар ўсди. 2024 йилда Ўзбекистон ялпи ички маҳсулоти 6,5% га ўсиб, $115 миллиардга етди, хорижий инвестициялар ҳажми эса 1,6 баробар ошиб, $34,9 миллиардни ташкил этди.

«Ўзбекистон-2030» стратегияси доирасида иқтисодиётни ислоҳ қилиш давом эттирилиши, ялпи ички маҳсулотни $200 миллиардга етказиш, ўртадан юқори даромадли мамлакат мақомига эришиш, тўғридан-тўғри хорижий инвестицияларни $110 миллиардга етказиш ва экспорт ҳажмини йиллик $45 миллиардга ошириш режалаштирилган.

Шу билан бирга, савдо-иқтисодий, инвестициявий ва саноат соҳаларида ҳамкорликни кенгайтириш учун улкан салоҳият мавжуд. Устувор йўналишлар сифатида қишлоқ хўжалиги, тўқимачилик саноати, фойдали қазилмалар қазиб олиш, энергетика ва нефть-кимё, соғлиқни сақлаш ва фармацевтика, хусусийлаштириш, логистика, алоқа ва туризм соҳалари қайд этилди.

Қувайт Савдо-саноат палатаси раҳбари Рабоҳ аль-Рабоҳ Ўзбекистоннинг икки томонлама ҳамкорликни ривожлантиришга қаратган саъй-ҳаракатларини юқори баҳолаб, икки давлат тадбиркорларини фаол ҳамкорликка чақирди. У, шунингдек, ҳар икки томон янги лойиҳалар ва ташаббусларни қўллаб-қувватлашга тайёр эканини таъкидлади.

Форум доирасида «B2B» ва «G2B» музокаралари, шунингдек, миллий маҳсулотлар кўргазмаси бўлиб ўтди. Тадбиркорлар янги ҳамкорлик алоқаларини ўрнатиш, қўшма лойиҳалар ва савдо шартномаларини муҳокама қилиш имкониятига эга бўлдилар.

Тадбир якунлари бўйича бир қатор инвестиция битимлари ва савдо шартномалари имзоланди. Иштирокчиларнинг баҳолашича, бу келишувлар Ўзбекистон ва Қувайт ўртасидаги иқтисодий алоқаларни сезиларли даражада мустаҳкамлашга ва ўзаро савдо ҳажмини тез суръатларда оширишга имкон беради.