Тошкент, Ўзбекистон (UzDaily.uz) — Остона шаҳрида Қозоғистоннинг “Йўловчи ташиш” АЖ ва Ўзбекистоннинг “Ўзбекистон темир йўллари” АЖ раҳбарияти ўртасида ишчи учрашув бўлиб ўтди. Музокараларда Қозоғистон ва Ўзбекистон ўртасидаги йўловчи ташиш соҳасида ҳамкорликни ривожлантириш истиқболлари муҳокама қилинди.

Музокаралар доирасида икки давлат ўртасида туристик поездларни йўлга қўйиш бўйича келишув имзоланди, шунингдек, қўшма лойиҳаларни амалга ошириш учун ишчи гуруҳ таркиби тасдиқланди. Ушбу йўналишдаги дастлабки қадам сифатида икки давлат темир йўл компаниялари томонидан ташкил этилган “Жибек Joly” туристик поезди ишга туширилди.

Мазкур йўналишга бўлган юқори талаб ва унинг икки давлат учун аҳамиятини инобатга олиб, “Жибек Joly” лойиҳасини ривожлантириш, шунингдек, янги туристик йўналишларни, жумладан, “Остана-Самарқанд” халқаро йўналишини очиш имкониятлари кўриб чиқилди. Бу Қозоғистон ва Ўзбекистон ўртасидаги туристик алоқаларни янада мустаҳкамлашга хизмат қилади.

Учрашувда халқаро йўналишлардаги поездлар жадвалини йўловчилар учун қулайроқ қилиш ва йўловчилар оқимини ошириш масалалари ҳам муҳокама қилинди.

Ўзбекистон томони ташаббуси билан №1/2 “Олмаота-Тошкент” поезди жадвалини қайта кўриб чиқиш таклиф этилди, бу йўловчилар учун жўнаш ва келиш вақтларини янада қулай қилиш имконини беради.

Шуни таъкидлаш жоизки, №1/2 “Олмаота-Тошкент” поезди Қозоғистон ва Ўзбекистон ўртасидаги транспорт алоқасида муҳим ўрин тутади. Ўтган йили мазкур йўналишда 72 мингдан ортиқ йўловчи ташилган бўлиб, бу йўналишга қизиқиш ортиб бораётганини кўрсатади. Икки давлат ўртасидаги масофа 988 км ни ташкил этади.

Шунингдек, ташриф давомида йўловчи ташиш соҳасини бошқариш, ҳаракат таркибини техник хизмат кўрсатиш, ахборот тизимларини жорий этиш ва чипталарни онлайн сотишни ташкил этиш бўйича тажриба алмашиш масалалари муҳокама қилинди.

“Йўловчи ташиш” АЖ ва “Ўзбекистон темир йўллари” АЖ йўловчиларга хизмат кўрсатиш сифатини яхшилаш ва Қозоғистон ҳамда Ўзбекистон ўртасида ташиш ҳажмини ошириш мақсадида ҳамкорликни ривожлантиришга тайёр эканликларини тасдиқладилар.