Ўзбекистон ва Қозоғистон икки томонлама кончилик ҳамкорлигини кенгайтиришга интилади

Тошкент, Ўзбекистон (UzDaily.uz) — Ўзбекистон Республикаси Тоғ-кон саноати ва геология вазири Б. Исламов ҳамда Қозоғистон Республикаси Саноат ва қурилиш вазири Э. Нагаспаев ўртасида учрашув бўлиб ўтди.

Учрашув давомида Ўзбекистон ва Қозоғистон ўртасидаги тоғ-кон саноати ва геология соҳасидаги ҳамкорликнинг бугунги ҳолати, тажриба алмашиш, қўшма лойиҳаларни амалга ошириш истиқболлари, ҳамкорликни кенгайтириш имкониятлари ҳамда бир қатор устувор йўналишлар бўйича ҳамкорликни чуқурлаштириш масалалари муҳокама қилинди.

Томонлар конструктив мулоқотни янада ривожлантиришга тайёр эканликларини билдирдилар ва икки давлат вазирликлари ўртасидаги ҳамкорлик самарадорлигини оширишга қаратилган ўзаро манфаатли алоқаларни мустаҳкамлаш муҳимлигини таъкидладилар.