Ўзбекистон ва Қозоғистон Буюк Ипак йўли йўналишларини ривожлантирмоқда

Тошкент, Ўзбекистон (UzDaily.uz) — “Ипак йўлида туризм” 30-Тошкент халқаро туризм ярмаркаси доирасида Туризм индустрияси қўмитаси раиси Нуртас Карипбаев билан учрашув бўлиб ўтди.

Музокаралар давомида томонлар стратегик ҳамкорликнинг юқори даражасини ва икки давлатнинг туризм соҳасида минтақавий интеграцияни ривожлантиришга қаратилган саъй ҳаракатларнинг самарасини таъкидладилар. 

Учрашувда ҳамкорликнинг асосий йўналишлари, жумладан, "Буюк Ипак йўли" бўйлаб қўшма трансчегаравий сайёҳлик йўналишларини ривожлантириш ва Самарқанд - Туркистон - Олмаота маданий кластерларини илгари суриш, туризм соҳасини рақамлаштириш, жумладан, замонавий IТ-ечимлар, таҳлил ва маркетинг платформаларини жорий этиш масалалари муҳокама қилинди.

Шунингдек, томонлар қўшма таълим дастурлари ва гидлар, меҳмонхона соҳаси мутахассислари ва туризм йўналишлари кадрлари малакасини ошириш масалаларини кўриб чиқдилар. 

“Марказий Осиё - Европа Иттифоқи” туризм форумининг асосий мавзуси бўлган ўзаро сайёҳлик оқимини кўпайтириш ва Марказий Осиё мамлакатларини глобал бозорларда, шу жумладан Европа йўналишида ягона туристик макроминтақа сифатида илгари суриш масалалари алоҳида ўрганилди.

Учрашув якунида томонлар амалий ҳамкорликни давом эттириш ва шериклик алоқаларини мустаҳкамлайдиган ҳамда икки мамлакат сайёҳлик соҳаси учун қўшимча имкониятлар яратадиган янги ташаббусларни ишлаб чиқишга тайёрлигини тасдиқладилар.