Ўзбекистон ва Қозоғистон 2030 йилга қадар 10 миллиард долларлик мақсад доирасида савдо ва инвестицияларни кенгайтиришни муҳокама қилишди

Тошкент, Ўзбекистон (UzDaily.uz) — 2026 йил 30 январь куни Ўзбекистон Республикаси Инвестициялар, саноат ва савдо вазири Лазиз Кудратов Қозоғистон Республикасининг Ўзбекистондаги Фавқулодда ва Мухтор Элчиси Бейбут Атамкулов билан учрашув ўтказди.

Томонлар савдо-иқтисодий, инвестициявий ҳамда транспорт соҳаларидаги ҳамкорликнинг бугунги ҳолати ва истиқболларини муҳокама қилдилар. Ўзаро савдода барқарор ижобий динамика қайд этилди ҳамда 2030 йилгача ўзаро савдо ҳажмини 10 миллиард АҚШ долларига етказиш бўйича Қўшма дастур доирасида товар айирбошлашни янада кенгайтиришга тайёрлик тасдиқланди.

2025 йил якунларига кўра, ўзаро товар айирбошлаш ҳажми 4,97 миллиард АҚШ долларини ташкил этиб, 11,4 фоизга ошди. Жумладан, экспорт 1,55 миллиард АҚШ долларига етиб, ўтган йилга нисбатан 1,2 фоизга кўпайди, импорт эса 3,4 миллиард АҚШ долларини ташкил этиб, 16,6 фоизга ўсди.

Шунингдек, 2026 йилда икки мамлакат Ҳудудлар раҳбарлари кенгашининг биринчи йиғилишини ўтказиш ҳамда «Made in Uzbekistan» ва «Made in Kazakhstan» саноат кўргазмаларини ташкил этиш масалалари кўриб чиқилди.

Учрашув якунида стратегик шерикликни янада чуқурлаштириш, инвестициявий ҳамкорликни кенгайтириш ва мунтазам конструктив мулоқотни давом эттиришга ўзаро тайёрлик тасдиқланди.