Ўзбекистон ва Қўшма Штатлар космик ва АТ соҳаларидаги ҳамкорликни мустаҳкамламоқда

Тошкент, Ўзбекистон (UzDaily.uz) — Ўзбекистон ва Америка Қўшма Штатлари космик технологиялар ва рақамли ривожланиш йўналишларида ҳамкорликни мустаҳкамлаб бормоқда. Ҳамкорликнинг асосий йўналишлари сунъий интеллект, рақамли инфратузилма ва қўшма инвестиция лойиҳаларини ўз ичига олади.

Рақамли технологиялар вазири Шерзод Шерматов АҚШ Экспорт-импорт банкининг бизнесни ривожлантириш бўйича катта мутахассиси Жон Ан билан учрашув ўтказиб, икки томонлама ҳамкорликни кенгайтириш истиқболларини муҳокама қилди.

Учрашув давомида космик технологиялар, сунъий интеллект, АТ инфратузилмани ривожлантириш йўналишларида ҳамкорликни кенгайтириш, шунингдек, қўшма инвестиция лойиҳаларини амалга ошириш масалалари кўриб чиқилди. Ўзбекистоннинг миллий космик дастури, жумладан илк сунъий йўлдошни учириш режалари, Ернинг масофадан зондлаш тизимларини ривожлантириш ҳамда замонавий ва барқарор рақамли инфратузилма яратиш масалаларига алоҳида эътибор қаратилди.

Томонлар, шунингдек, қўшма лойиҳаларда АҚШ маҳсулотлари ва хизматларидан фойдаланиш масаласини муҳокама қилиб, бундай ташаббусларни тегишли молиялаштириш талаблари ва механизмлари билан уйғунлаштириш муҳимлигини таъкидладилар.

Ўзбекистон томони мамлакатни минтақавий АТ марказига айлантириш бўйича амалга оширилаётган ишлар ҳақида маълумот берди. Жумладан, ихтисослашган марказлар ташкил этиш, рақамли хизматлар экспортини кенгайтириш ҳамда халқаро технологик компаниялар учун қулай шарт-шароитлар яратиш йўналишлари қайд этилди.

Иштирокчилар Ўзбекистондаги кучли инсон капитали, АТ соҳасининг жадал ривожланаётгани ҳамда стартап экотизимини қўллаб-қувватлашга қаратилган кенг қамровли чора-тадбирларни алоҳида таъкидладилар.

Учрашув якунида томонлар космик технологиялар, сунъий интеллект ва рақамли инфратузилма йўналишларида ҳамкорликни янада кенгайтириш, шунингдек аниқ инвестиция лойиҳаларини ишлаб чиқиш ва амалга ошириш бўйича қўшма ишларни давом эттиришга келишиб олдилар.