Ўзбекистон ва Полша қишлоқ хўжалиги соҳасидаги ҳамкорликни муҳокама қилишди

Тошкент, Ўзбекистон (UzDaily.uz) — Жорий йилнинг 27 ноябрь куни Ўзбекистон Савдо-саноат палатасида Польша Республикаси қишлоқ хўжалиги ва қишлоқни ривожлантириш вазири Стефан Краевский бошчилигидаги делегация билан икки томонлама учрашув бўлиб ўтди.

Тадбирда Ўзбекистон томонидан Савдо-саноат палатаси, Техник жиҳатдан тартибга солиш агентлиги ҳамда қишлоқ хўжалиги ва қайта ишлаш соҳасида фаолият юритаётган йирик корхоналар вакиллари иштирок этди.

Учрашувни Савдо-саноат палатаси раиси маслаҳатчиси Алишер Шайхов очиб, Ўзбекистонда амалга оширилаётган иқтисодий ислоҳотлар, хусусий секторни қўллаб-қувватлаш сиёсати ҳамда саноат ва аграр соҳаларда кузатилаётган барқарор ўсиш тенденциялари ҳақида маълумот берди.

Шунингдек, учрашувда мева-сабзавот, сут-гўшт ва паррандачилик маҳсулотларининг экспорт салоҳияти, саноат ва аграр кооперацияни ривожлантириш масалалари муҳокама қилинди. Ўзбекистон ва Польша компанияларининг Европа, Марказий Осиё, МДҲ, Хитой, Яқин Шарқ ва Афғонистон бозорларига қўшма маҳсулотларни етказиб бериш учун логистик-ишлаб чиқариш хаблари сифатидаги салоҳияти алоҳида қайд этилди.

Техник жиҳатдан тартибга солиш агентлиги директори Акмал Жуманазаров миллий стандартлаштириш ва сертификатлаштириш тизимини халқаро талабларга мослаштириш бўйича амалга оширилаётган ишлар ҳақида маълумот берди.

Польша томони гўшт-сут маҳсулотларини қайта ишлаш, уруғчилик, озиқ-овқат саноати, энергиянинг муқобил манбалари, гидропоника, ветеринария ва фитосанитар назорат каби йўналишларда қўшма лойиҳаларни амалга оширишга тайёрлигини билдирди.

Учрашувда, шунингдек, икки мамлакатда маҳсулот ва юкларни қайта ишлашни таъминлайдиган қўшма саноат-логистика марказларини ташкил этиш масаласи ҳам кўриб чиқилди. Ҳар бир йўналиш бўйича ишчи гуруҳлар тузиш ва мутахассислар ўртасида ўзаро ташрифлар алмашиш юзасидан келишувга эришилди.

Учрашув икки давлат ўртасидаги савдо, саноат ва аграр технологиялар соҳасидаги ҳамкорликни кенгайтиришда муҳим қадам бўлди.