Ўзбекистон ва Полша озиқ-овқат таъминотини кенгайтириш масалаларини муҳокама қилишди

Тошкент, Ўзбекистон (UzDaily.uz) — Қишлоқ хўжалиги вазири маслаҳатчиси Нуриддин Қўшназаров ҳамда Полша Республикаси Қишлоқ хўжалиги ва қишлоқларни ривожлантириш вазири Стефан Краевски «Korzinka» супермаркетлар тармоғи асосчиси Зафар Ҳошимов билан учрашув ўтказди.

Мулоқот чоғида икки томонлама савдо-иқтисодий ҳамкорликни кенгайтириш, озиқ-овқат таъминотини диверсификация қилиш ҳамда бозорга янги маҳсулотларни етказиб бериш бўйича истиқболли йўналишлар муҳокама қилинди.

Учрашув аввалида Зафар Ҳошимов «Korzinka» тармоғининг фаолияти, республика миқёсида аҳолига сифатли ва барқарор таъминот яратишдаги ўрни ҳақида батафсил маълумот тақдим этди.

Суҳбат давомида Полша маҳсулотларини Ўзбекистон бозорига олиб киришда «Корзинка» тармоғи муҳим шерик сифатида катта имкониятларга эга экани таъкидланди. Тармоқнинг йирик логистика инфратузилмаси ва кенг савдо майдони Полша компаниялари учун ишончли платформа сифатида алоҳида қайд этилди.

Полша делегацияси Ўзбекистонга ўз маҳсулотларини мунтазам ва тизимли равишда экспорт қилишга тайёрлигини билдирди. Жумладан, шакар етказиб бериш бўйича дастлабки таклифлар тақдим этилди. Шунингдек, озиқ-овқатнинг бошқа турлари ва қайта ишланган маҳсулотларни экспорт қилиш бўйича ҳам кенг қамровли режалар илгари сурилди.

Учрашув якунида томонлар савдо алмашинувини ошириш, Полшанинг сифатли маҳсулотларини Ўзбекистон истеъмолчиларига етказиш ва чакана савдо тармоғи билан узоқ муддатли ҳамкорликни мустаҳкамлаш бўйича ўзаро фикр алмашдилар.

Мазкур учрашув икки давлат ўртасидаги манфаатли шерикликни янада кенгайтиришга хизмат қиладиган муҳим қадам бўлди.