Тошкент, Ўзбекистон (UzDaily.uz) — Покистон Ислом Республикаси Бош вазири Шаҳбоз Шарифнинг расмий ташрифи доирасида Савдо-саноат палатаси раиси Даврон Вахабов ва Ўзбекистон транспорт вазири Илҳом Маҳкамов иштирокида Покистоннинг етакчи транспорт компаниялари вакиллари билан учрашув ўтказилди.

Учрашувда логистика соҳасидаги долзарб масалалар ва мавжуд тўсиқлар муҳокама қилинди. Хусусан, Покистон логистика компанияларининг мултимодал коридорлар орқали энг қисқа йўналишларни ташкил этишда дуч келаётган амалий ва ташкилий қийинчиликлар атрофлича кўриб чиқилди.

Шунингдек, Ўзбекистоннинг Марказий Осиёда логистика “хаб”и сифатидаги роли муҳокама қилинди. Транспорт вазири Илҳом Маҳкамов мамлакатнинг бутун Марказий Осиё бозорига хизмат кўрсатувчи “хаб” сифатида фаолият юритиш таклифини илгари сурди. Бу ташаббус икки давлат ўртасидаги транспорт ва логистика тизимларини янада интеграция қилиш имконини беради.

Учрашувда, шунингдек, янги “Трансафғон” лойиҳаси доирасида Ўзбекистоннинг Марказий Осиё логистика “хаб”и сифатида Карачи портига тўғридан-тўғри чиқиш имконияти муҳокама қилинди. Покистон томони ушбу ташаббусни тўлиқ қўллаб-қувватлади.

Учрашув якунида томонлар қисқа муддат ичида Ўзбекистон ва Покистон логистика соҳасини янада ривожлантириш ҳамда икки давлат ўртасидаги стратегик алоқаларни мустаҳкамлашга қаратилган умумий келишувга эришишга келишиб олдилар. Бу ҳамкорлик иқтисодий интеграцияни чуқурлаштириш ва минтақада транспорт тизимларини янада самарали ташкил этишда муҳим қадам бўлиши кутилмоқда.