Тошкент, Ўзбекистон (UzDaily.uz) — Вазир ўринбосари Озода Жўраева бошчилигидаги масъуллар бугун Осиё тараққиёт банки Бозорлар ривожланиши ва ДХШ идораси бўлими раҳбари Муҳаммад Азим билан учрашди.

Маълумки, коммунал хизмат кўрсатиш соҳалари – аҳолининг турмуш даражасига бевосита таъсир кўрсатади. Ушбу йўналишларда мамлакатимизда кенг ислоҳотлар даври бошланган ва бу жараёнда Осиё тараққиёт банки билан яқин ҳамкорлик қилиш муҳим стратегик аҳамият касб этиб бормоқда.

Хусусан, ичимлик сув таъминоти ва оқова сувларни чиқариш соҳасида 500 миллион доллардан ортиқ маблағ ажратилган бўлиб, 4 та йирик лойиҳа амалиётга татбиқ этилмоқда.

- Сўнгги йилларда ҳурматли юртбошимизнинг соҳага кўрсатаётган эътиборлари туфайли аҳолининг марказлашган ичимлик суви билан таъминланганлик даражаси 81 фоизга етди. Бу катта натижа. Аммо соҳада ечимини кутаётган муаммолар ҳам етарли. Биргина оқова сув хизматларини кўрсатиш даражаси 20 фоиз бўлиб, вазирлигимиз томонидан ушбу соҳани ривожлантиришга, бунда давлат хусусий шерикликни кенгайтиришга устувор даражада қаралмоқда,- деди Озода Жўраева.

Йиғилишда Осиё тараққиёт банки билан Наманган шаҳар оқова сув иншоотини давлат хусусий шериклик асосида бошқарувга бериш юзасидан йўлга қўйилган ҳамкорлик ишлари, ичимлик суви таъминоти ва оқова сув чиқариш соҳасида давлат хусусий шерикликни ривожлантириш бўйича қарор лойиҳаси муҳокама қилинди.

Муҳаммад Азим Ҳошими ҳам ўз ўрнида мамлакатимизда сув таъминоти соҳасини яхшилаш лойиҳаларида иштирок этаётганидан мамнунлигини билдирди.

Ҳамкорликда манфаатли лойиҳаларни янада такомиллаштиришга келишиб олинди.