Ўзбекистон ва Латвия савдо-иқтисодий ва инвестициявий ҳамкорликни кенгайтириш масалаларини муҳокама қилишди

Тошкент, Ўзбекистон (UzDaily.uz) — 5 март куни Тошкентда Ўзбекистон ва Латвия ўртасидаги савдо-иқтисодий ҳамда инвестициявий ҳамкорликни ривожлантиришга бағишланган қатор тадбирлар бўлиб ўтди.

Латвия делегацияси ташрифи доирасида Ўзбекистон Республикаси инвестициялар, саноат ва савдо вазири Лазиз Кудратов ҳамда Латвия транспорт вазири Атис Šвинка ўртасида музокаралар ўтказилди.

Шунингдек, Ўзбекистон–Латвия Ҳукуматлараро комиссиясининг 9-йиғилиши ва икки мамлакат давлат идоралари ҳамда бизнес вакиллари иштирокида Ўзбекистон-Латвия бизнес-форуми ташкил этилди.

Томонлар ҳамкорликнинг бугунги ҳолати ва истиқболларини, саноат кооперациясини кенгайтириш, Марказий Осиё ва Европа Иттифоқи ўртасидаги транспорт-логистика йўналишларини ривожлантириш, шунингдек рақамли технологиялар, қишлоқ хўжалиги ва таълим соҳаларидаги ҳамкорликни муҳокама қилдилар. 2025 йил якунларига кўра ўзаро савдо ҳажми $273,2 млн ташкил этди. Томонлар ушбу кўрсаткични ўрта муддатда $500 млн етказмоқчилар.

Тадбирлар якунида Ўзбекистон-Латвия ва Латвия-Ўзбекистон ишбилармонлик ҳамкорлиги кенгашлари фаолиятини тиклаш тўғрисидаги меморандум ҳамда Иқтисодий ҳамкорликни мустаҳкамлаш бўйича Ҳаракатлар режаси имзоланди. B2B учрашувлари ўтказилиб, логистика, саноат, қишлоқ хўжалиги ва рақамли иқтисодиёт соҳаларида қўшма лойиҳаларни ишлаб чиқишга келишилди.