Тошкент, Ўзбекистон (UzDaily.uz) — 2025 йил 27 август куни Ўзбекистон Республикаси Инвестициялар, саноат ва савдо вазири ўринбосари Хуррам Тешабаев Беларусиянинг «KUVO» компанияси ҳамда тегишли вазирлик ва идоралар вакиллари билан учрашув ўтказди.

«KUVO» – Беларус ва МДҲдаги етакчи ишлаб чиқарувчи корхоналардан бири бўлиб, турли транспорт воситалари учун кенг ассортиментдаги шиша маҳсулотлари ишлаб чиқаришга ихтисослашган.

Музокаралар давомида машинасозлик соҳасидаги ҳамкорлик истиқболлари ва қўшма инвестиция лойиҳаларини амалга ошириш масалалари муҳокама қилинди. Хусусан, автобуслар учун кўп қаватли шиша, панорамали ва бурилувчи ойналар, шунингдек, транспорт воситалари учун ясси ва эгри темперланган шишалар ишлаб чиқариш ва етказиб бериш ҳажмларини кенгайтириш имкониятлари кўриб чиқилди.

Томонлар ҳамкорликни ривожлантиришга ўзаро қизиқиш билдирар экан, истиқболли лойиҳаларни амалга ошириш юзасидан музокараларни давом эттиришга келишиб олдилар. Шу муносабат билан, локализация ташаббусларини баҳолаш мақсадида техник ва иқтисодий маълумотлар алмашинуви йўлга қўйилиши белгиланди.