Ўзбекистон ва JICA инвестиция ва таълим лойиҳаларини амалга оширишни муҳокама қилишди

Тошкент, Ўзбекистон (UzDaily.uz) — 31 март куни Ўзбекистон Республикаси Инвестициялар, саноат ва савдо вазири Лазиз Кудратовнинг кун тартиби Фурасато Танака бошчилигидаги JICA делегацияси билан учрашувга уланди.

Томонлар 2025 йил декабрь ойидаги олий даражали ташриф давомида келишилган барча лойиҳалар белгиланган режа асосида амалга оширилаётганини қайд этишди. Бу, айниқса, чорвачилик, кичик бизнесни қўллаб-қувватлаш ҳамда инвестициявий ҳамкорлик йўналишларига тааллуқлидир.

Энергетика соҳасидаги лойиҳалар ҳам атрофлича кўриб чиқилди: ҳозирги вақтда саноат ва ижтимоий объектларнинг энергия самарадорлигини ошириш бўйича тегишли ишлар олиб борилмоқда.

Шунингдек, JIСА ва JETRO билан биргаликда эркин иқтисодий зоналарни ривожлантириш чоралари давом эттирилмоқда.

Томонлар техник тайёргарлик жараёнларини тезлаштириш ҳамда Япония ишбилармон доиралари учун Ўзбекистоннинг инвестициявий салоҳиятини кенгроқ намойиш этишга келишиб олдилар.

SТEМ-таълими йўналишида муҳандисларни тайёрлаш мақсадида янги лабораториялар ташкил этиш ва Япония олий ўқув юртлари билан ҳамкорлик дастурларини йўлга қўйиш масалалари муҳокама қилинди.

Шу билан бирга, PSIF дастури орқали хусусий секторни тўғридан-тўғри молиялаштириш кўламини кенгайтириш муҳимлиги таъкидланди.

Музокаралар якунида Япония делегацияси 2026 йилнинг 16–19 июнь кунлари бўлиб ўтадиган Тошкент халқаро инвестиция форумига таклиф этилди.