Тошкент, Ўзбекистон (UzDaily.uz) — Жорий йилнинг 27 январь куни Ўзбекистон Республикаси Иқтисодиёт ва молия вазирлиги вакиллари ва Жаҳон банки вакиллари ўртасида барқарор иситиш тизимларини ривожлантириш масалаларига бағишланган учрашув бўлиб ўтди. Унда Иқтисодиёт ва молия вазири ўринбосари Самандар Садуллаев ҳамда бир қатор таркибий бўлинмалар раҳбар ходимлари, шунингдек, Жаҳон банкининг глобал амалиёт раҳбари Стефани Хиль, энергетика бўйича бош мутахассис Мануэль Берленжиеро ва бир қанча вакиллар қатнашди.

Музокараларда энергия самарадорлигини ошириш, соҳада “яшил иқтисодиёт” тамойилларини инобатга олиш ва иқлим ўзгаришларига мослашиш бўйича қатор масалалар муҳокама қилинди.

Учрашувда Жаҳон банкининг техник ва молиявий кўмаги асосида ижтимоий бинолар, якка тартибдаги уй-жойлар ҳамда кўп квартирали биноларда энергия самарадорлигини оширишга қаратилган дастурлар бўйича ҳамкорлик масалалари кўриб чиқилди. Шунингдек, хорижий тажрибалар юзасидан Жаҳон банки томонидан Европанинг марказлаштирилган иситиш тизимлари таҳлили, Польшада амалга оширилган иссиқлик насослари дастури тажрибаси ва унинг натижалари тақдим этилди. Ушбу дастур орқали марказлаштирилган иситиш тизимларини модернизация қилиш ва кичик ҳамда ўрта бизнес учун янги “яшил” иш ўринларини яратиш йўналишида эришилган ютуқлар ҳақида сўз юритилди.

Ўзбекистон томони иситиш тизимига субсидияларни бартараф этиш, шунингдек, бино турларининг хусусиятлари ва ҳудудий иқлим шароитларини ҳисобга олган ҳолда ечимлар ишлаб чиқиш бўйича Жаҳон банки билан биргаликда ишлашни қўллаб-қувватлади. Иситиш тизимлари учун янги тарифлар методологиясини ишлаб чиқиш, биноларни совитиш ва иситиш комбинациясини ташкил қилиш, шунингдек, энергия самарадор технологияларни аҳоли хонадонларида татбиқ этишни такомиллаштириш муҳимлиги таъкидланди.

Бундан ташқари, томонлар энергия тежамкор кичик лойиҳалар бўйича ягона миллий дастур ишлаб чиқиш, иқлим ўзгаришларига мос стратегияларни татбиқ этиш ва истеъмолчиларнинг эҳтиёжларидан келиб чиққан ҳолда марказлаштирилган иситиш тизимларини модернизация қилиш масалаларини муҳокама қилди. Музокараларда ҳудудий иситиш инфратузилмалари ва бинолар ҳолатининг хилма-хиллиги сабабли қарор қабул қилишни марказсизлаштиришнинг аҳамияти алоҳида таъкидланди.

Учрашув якунида мазкур масалалар бўйича тавсиялар ишлаб чиқиш ва ҳамкорликдаги лойиҳаларни мувофиқлаштиришни давом эттиришга келишилди. Томонлар ушбу музокараларни видео конференс алоқа орқали келгусида ҳам давом эттиришга ва барқарор иситиш тизимлари бўйича комплекс стратегияларни ишлаб чиқишга келишиб олди.