Тошкент, Ўзбекистон (UzDaily.uz) — 2025 йил 28 январь куни Ўзбекистон Республикаси Олий таълим, фан ва инновациялар вазири Қўнғиротбой Шарипов Италиянинг Турин шаҳри мери Стефано Ло Руссо бошчилигидаги делегация билан учрашув ўтказди. Учрашувда икки мамлакат ўртасида таълим, фан ва инновация соҳаларидаги алоқаларни янада ривожлантириш ва янги ташаббусларни амалга ошириш масалалари муҳокама қилинди.

Учрашувда Италия Республикасининг Ўзбекистондаги Фавқулодда ва Мухтор элчиси Пиергабриеле Пападия де Боттини, Турин шаҳри мери аппарати раҳбари Валентина Кампана, Турин шаҳри мериясининг Халқаро алоқалар бўлими раҳбари Даниэла Силви, Турин политехника университети ректори Стефано Корняти, Турин Савдо-саноат палатаси президенти Даро Галлина, Саноатчилар уюшмаси президенти Марко Гаем, шунингдек Аэрокосмик, барқарор ҳаракатчанлик, мехатроника, завод муҳандислиги ва бош пудратчилар уюшмаси президенти Жоржиэй Гаролой иштирок этдилар.

Вазир Қ. Шарипов учрашувда Ўзбекистонда олий таълим, фан ва инновациялар соҳасида олиб борилаётган ислоҳотлар, Италия билан олий таълим соҳасидаги мавжуд ҳамкорликлар, хусусан, Италия университетларининг Ўзбекистондаги филиаллари фаолияти ҳақида сўзлаб берди. Шунингдек, ўзаро алоқаларни ривожлантиришга оид қатор таклифлар илгари сурилди. 

Жумладан, Турин шаҳридаги Турин политехника университетида таҳсил олаётган ушбу университет ётоқхонасидан ўзбекистонлик талабалар учун алоҳида жой ажратиш, Тошкентдаги Турин политехника университетида эса инкубатор ташкил этиш, шунингдек, талабаларнинг Италия корхоналарида амалиёт ўташини йўлга қўйиш каби ташаббуслар таклиф этилди. Турин политехника университети ректори Стефано Корняти бу ташаббусларни қўллаб-қувватлади.

Турин шаҳри мери Стефано Ло Руссо Ўзбекистоннинг иқтисодий ривожланишини юқори баҳолаб, Турин ва Тошкент ўртасидаги ҳамкорликнинг иккинчи босқичини йўлга қўйиш муҳим эканлигини таъкидлади. У Турин политехника университети мисолида 15 йиллик самарали ҳамкорлик тажрибасини алоҳида қайд этди. Шунингдек, Тошкент шаҳрида “Италия-Ўзбекистон илғор муҳандислик маркази”ни ривожлантириш ташаббусини илгари сурди.

Италия томонидан кадрлар тайёрлаш, тадбиркорлик ва инновация йўналишларида ҳамкорликни ривожлантириш, қўшма лойиҳаларни амалга ошириш, шунингдек, энергетика, атроф-муҳит, биотехнология, сунъий интеллект каби соҳаларда ҳамкорлик қилишга қизиқиш билдирилди. Элчи Пиергабриеле Пападия де Боттини икки мамлакат ўртасидаги таълим, фан ва инновация соҳаларидаги ҳамкорликни ривожлантиришга ҳар томонлама ёрдам кўрсатишга тайёрлигини билдирди.