Ўзбекистон ва Гретсия савдо-иқтисодий ҳамкорлик ва бизнес алоқаларини фаоллаштиришга келишиб олдилар

Тошкент, Ўзбекистон (UzDaily.uz) — Ўзбекистон Савдо-саноат палатаси раиси маслаҳатчиси Алишер Шайхов Грециянинг Ўзбекистондаги Фавқулодда ва Мухтор элчиси Параскеви Цевелеки билан учрашув ўтказди.

Музокаралар марказида — савдо-иқтисодий ҳамкорликни кенгайтириш ва икки давлат ишбилармон доиралари ўртасида тўғридан-тўғри алоқаларни фаоллаштириш масалалари бўлди. Томонлар қўшма лойиҳалар сонини ошириш ва бизнес учун янги имкониятлар яратиш муҳимлигини таъкидладилар.

Жорий йилнинг сентябр ойида Греция бизнес делегациясининг Ўзбекистонга ташрифи режалаштирилмоқда. Ташриф доирасида қўшма бизнес-форум ҳамда B2B учрашувлар ўтказилиши кутилмоқда. Бу тадбирлар тадбиркорларга тўғридан-тўғри шерик топиш ва амалий келишувларга эришиш имконини беради.

Учрашувда Ўзбекистоннинг инвестицион салоҳияти, устувор тармоқлар ва ҳамкорлик учун мавжуд шароитлар ҳақида ҳам маълумот тақдим этилди.

Якунда томонлар ишбилармонлик алоқаларини янги босқичга олиб чиқишга тайёр эканликларини билдириб, келишилган ташаббусларни амалга ошириш бўйича ҳамкорликни давом эттиришга келишиб олдилар.