Ўзбекистон ва Европа Иттифоқи туризм соҳасида ҳамкорликни кучайтирмоқда

Тошкент, Ўзбекистон (UzDaily.uz) — “Ипак йўлида туризм” 30-Тошкент халқаро туризм ярмаркаси доирасида Европа Иттифоқининг Марказий Осиё бўйича махсус вакили Эдуардс Стипрайс ва Европа комиссияси (DG MOVE) директори Мона Борклюнд билан учрашув бўлиб ўтди.

Музокаралар давомида икки томонлама ҳамкорликнинг амалдаги ҳолати ва туризм, барқарор мобиллик ва транспорт соҳаларидаги келгуси ўзаро ҳамкорлик йўналишларини кўриб чиқилди.

Туризм соҳаси учун кадрлар тайёрлаш, Европа таълим платформаларини жалб этиш, малака ошириш дастурлари ва тажриба алмашиш имкониятларига алоҳида эътибор қаратилди. Шунингдек, келгуси форумни мунтазам равишда ўтказиш, иштирокчилар географиясини кенгайтириш ва тематик йўналишларни кўпайтириш масалалари ҳам муҳокама қилинди.

Учрашувда транспорт боғлиқлигини ривожлантириш, авиақатновлар сонини кўпайтириш ва Марказий Осиё ва ЕИ мамлакатлари ўртасида туристик саёҳатларни соддалаштириш масалалари ҳам кўриб чиқилди. Европа Иттифоқининг барқарор туризм, хизматларни рақамлаштириш ва «яшил» туризм маршрутларини илгари суриш бўйича илғор тажрибалари муҳокама қилинди.

Европалик ҳамкорлар Ўзбекистоннинг “Марказий Осиё – Европа Иттифоқи” янги минтақалараро платформасини яратиш ташаббусини юқори баҳоладилар ва уни янада ривожлантиришга, шунингдек, ўзбек мутахассисларининг касбий малакасини оширишга кўмаклашишга тайёрлигини билдирдилар.

Учрашув якунида, томонлар туризм йўналиши рақобатбардошлигини ошириш, инсон капиталини мустаҳкамлаш ва Марказий Осиё ҳамда Европа Иттифоқи ўртасидаги ҳамкорликни кенгайтиришга қаратилган стратегик шерикликни чуқурлаштиришни тасдиқладилар.