Тошкент, Ўзбекистон (UzDaily.uz) — Ўзбекистон Президенти ёрдамчиси Саида Мирзиёева БМТ Бош котиби ёрдамчиси ва БМТ Тараққиёт дастурининг Европа ва МДҲ бўйича минтақавий бюроси директори Ивана Живкович билан учрашув ўтказди.

Учрашув чоғида томонлар Ўзбекистон ва БМТ Тараққиёт дастури (БМТТД) ўртасидаги ҳамкорликни кенгайтириш йўлларини муҳокама қилдилар. Айниқса, Қорақалпоғистон ва Қўнғиротбўйи минтақаларида барқарор ривожланишни қўллаб-қувватлаш масалаларига алоҳида эътибор қаратилди.

Музокараларда қуйидаги устувор йўналишлар бўйича ҳамкорлик истиқболлари муҳокама қилинди:

Ёшлар сиёсати — ёш авлодни ижтимоий фаол ҳаётга жалб этиш;

Соғлиқни сақлаш — маҳаллий аҳоли учун тиббий хизмат сифатини ошириш;

Маданият — миллий меросни асраш ва маданий алмашинувни ривожлантириш;

Барқарор туризм — экологик ва ижтимоий жиҳатдан масъулиятли туризмни йўлга қўйиш.

«Биз аҳолини, айниқса ёшларни, ривожланиш жараёнига жалб этишга интилмоқдамиз. Чунки уларда энтузиазм, ижодий ёндашув ва ўзгаришларга интилиш бор», — дея таъкидлади Саида Мирзиёева ўзининг Telegram-каналида.

У шунингдек, Ўзбекистон ва БМТТД ёндашувлари кўп жиҳатдан мос келишини қайд этди:
«Ишончим комилки, қўшма саъй-ҳаракатларимиз натижасида биз ғояларни амалий лойиҳаларга айлантирамиз ва улар маҳаллий аҳоли ҳаётига ҳақиқий фойда келтиради», — деди у.