Тошкент, Ўзбекистон (UzDaily.uz) — Божхона қўмитасида БМТ Наркотиклар ва жиноятчиликка қарши курашиш бошқармасининг Ўзбекистондаги минтақавий ваколатхонаси раҳбари Оливер Штолпе билан учрашув бўлиб ўтди.

Таъкидлаш жоизки, мазкур ваколатхона билан ўзаро ҳамкорлик минтақа хавфсизлигини таъминлашда ҳар томонлама самарали бўлмоқда. Сўнгги 4 йилда йўловчилар ва юклар оқимини назорат қилиш ҳамда кинология ва экспертиза бўйича минтақавий дастурларда конструктив ҳамкорлик йўлга қўйилди.

Юздан зиёд семинар, тренинг ва учрашувлар ташкил этилиб, 645 нафар божхона ходимининг малакаси оширилди, республика бўйлаб чегараларда тезкор маълумот алмашинув каналларини ташкил этиш орқали наркотик, прекурсор ва психотроп моддаларнинг ноқонуний айланмасига қарши курашиш самарадорлигини оширишга хизмат қилувчи ҳамкорлик офисларининг сони 8 тага, мобил идоралар гуруҳларининг сони 13 тага етди.

Ҳозирда “Чуқурсой техник идора”, «Яллама», «Олот», «Айритом» ва «Авиаюклар» божхона постларида порт назорат гуруҳлари фаолият юритмоқда. Мазкур гуруҳлар томонидан 162 та ҳолатда 10,2 млн долларлик товарларнинг ҳамда бир неча тонна наркотик воситаларнинг ноқонуний айланмасига чек қўйилган.

Учрашувда Жаҳон божхона ташкилотининг минтақавий мақомини қўлга киритган Марказий божхона лабораторияси қошида Наркотиклар ва жиноятчиликка қарши курашиш бошқармаси билан ҳамкорликда “Ихтисослашган ўқув маркази”ни ҳамда Самарқанд халқаро аэропортида “Авиа юклар назорат гуруҳи”ни ташкил этиш ва бошқа масалалар атрофлича муҳокама қилинди.

Учрашувдан сўнг меҳмонлар Марказий божхона лабораторияси ва Божхона расмийлаштируви маркази фаолияти билан яқиндан танишишди.