Ўзбекистон ва Allied Green Ammonia Хоразмда реактив ёқилғи ишлаб чиқариш лойиҳасини муҳокама қилмоқда

Тошкент, Ўзбекистон (UzDaily.uz) — Ўзбекистон Республикаси Инвестициялар, саноат ва савдо вазири Лазиз Кудратов "Allied Green Ammonia" компанияси бошқаруви раиси Алфред Бенедикт билан учрашди.

Музокараларда Хоразм вилоятида авиация ёқилғиси ишлаб чиқариш бўйича йирик саноат лойиҳасини амалга ошириш истиқболлари ва амалий жиҳатлари муҳокама қилинди.

Жорий йил август ойида Тошкентда лойиҳа амалга оширилишига ҳуқуқий асос яратган амалий шартлар тўғрисида келишув имзоланган эди.

Учрашув якунида томонлар ушбу лойиҳанинг Ўзбекистонда қайта тикланувчи энергетика ва саноат кооперациясини ривожлантиришдаги стратегик аҳамиятини таъкидладилар ҳамда уни амалга ошириш бўйича босқичма-босқич ҳамкорликка тайёр эканликларини билдирдилар.

Лойиҳа амалга оширилиши Ўзбекистоннинг энергетик хавфсизлигини сезиларли даражада мустаҳкамлаш, экспорт салоҳиятини ошириш ва янги иш ўринлари яратишга хизмат қилади. Шунингдек, «яшил» энергетика соҳасида илғор технологияларнинг жорий этилиши мамлакат иқтисодиётини диверсификация қилиш ва углерод нейтраллигига эришиш йўлида муҳим қадам бўлади.