Ўзбекистон ва Афғонистон ўзаро бизнес ҳамкорлигини кенгайтирмоқда

Тошкент, Ўзбекистон (UzDaily.uz) — Ўзбекистон Савдо-саноат палатаси раиси Даврон Вахабов Бирлашган Араб Амирликларининг Дубай шаҳрида жойлашган Афғонистон ишбилармонлар кенгаши (ABC-Dubai) раиси, жаноб Ҳожи Обайдуллоҳ Садир Хайл билан учрашув ўтказди.

ABC-Dubai — 2005 йилда ташкил этилган ва Дубай Савдо-саноат палатаси томонидан тан олинган нодавлат ташкилот бўлиб, БААдаги афғон тадбиркор ва инвесторларни бирлаштиради. У Афғонистон, БАА ва минтақада савдо ҳамда сармоявий ҳамкорликни ривожлантиришда муҳим платформа ҳисобланади. Ташкилот таркибида савдо, логистика, қурилиш, молия, қишлоқ хўжалиги ва ишлаб чиқариш соҳаларида фаолият юритувчи 170 дан ортиқ компания мавжуд.

Учрашувда икки давлат ишбилармон доиралари ўртасидаги иқтисодий алоқаларни кенгайтириш, сармоявий ҳамкорликни кучайтириш ҳамда янги қўшма лойиҳаларни амалга ошириш масалалари муҳокама қилинди.

Томонлар Дубайда фаолият юритаётган йирик афғон тадбиркорларини Ўзбекистондаги янги сармоявий имкониятлар билан таништириш, уларни қўшма лойиҳаларга жалб этиш зарурлигини таъкидладилар.

Шунингдек, Термиз шаҳрида — Ўзбекистон ва Афғонистон чегарасида жойлашган стратегик савдо ва логистика маркази базасида — қўшма бизнес ташаббуслар, ишлаб чиқариш кооперацияси ва юк ташиш инфратузилмасини ривожлантириш бўйича таклифлар кўриб чиқилди.

Учрашув якунида икки давлат ўртасидаги иқтисодий шерикликни мустаҳкамлаш, тадбиркорлик фаолияти учун қулай шароит яратиш ва минтақавий ҳамкорликни янги босқичга олиб чиқиш бўйича келишувга эришилди.