Тошкент, Ўзбекистон (UzDaily.uz) — Тоғ-кон саноати ва геология вазирлигида вазир ўринбосари У. Юсупов, вазирлик мутасаддилари билан биргаликда Action Group Holdings компанияси ижро қўмитаси аъзоси М.Абдуллоҳ раҳбарлигидаги делегация вакиллари билан учрашув ўтказди.

Хориж делегацияси раҳбари учрашувнинг ташкил қилинганидан миннатдор эканини билдириб, Ўзбекистонда тоғ-кон саноати соҳасида амалга оширилаётган ислоҳотлар, инвесторларга яратилаётган шароитлар катта қизиқиш уйғотгани, хусусан муҳим минераллар йўналишида ҳамкорликни мустаҳкамлаш кераклигини таъкидлади.

Вазирлик раҳбарияти, мутасаддилар вазирликнинг асосий мақсад ва вазифалари тўғрисида маълумот бериб, инвестиция муҳитини яхшилаш ҳамда ўзаро ҳамкорликка тайёрлигини қайд этдилар.

Шунингдек, учрашувда 2024 йилда Президент Қарори билан “Ўзбекистон технологик металлар комбинати” АЖ ташкил қилингани, литий, графит, вольфрам, тантал-ниобий, магний каби муҳим хомашё захираларидан унумли фойдаланиш, уларни чуқур қайта ишлаш орқали юқори қийматли маҳсулот занжирини яратиш унинг асосий вазифалари этиб белгиланганига урғу берилди.