Ўзбекистон тадбиркорлари Витебск вилоятида чорвачилик салоҳиятини ўрганмоқда

Тошкент, Ўзбекистон (UzDaily.uz) — Айни пайтда Ўзбекистон тадбиркорларидан иборат делегация Беларусь Республикасининг Витебск вилоятида бўлиб, ҳудуддаги чорвачилик соҳасидаги имкониятларни жойига чиққан ҳолда ўрганмоқда.

Ташриф доирасида делегация Ушачск, Миоры, Браслав ва Шумилинский туманларида жойлашган 10 га яқин замонавий чорвачилик мажмуалари фаолияти билан танишди. Жойларда ишлаб чиқариш жараёнлари, инфратузилма ва инвестиция имкониятлари атрофлича кўриб чиқилди.

Тадбиркорларга туман ижроия қўмиталари раҳбарлари ҳамроҳлик қилиб, қизиқтирган масалалар бўйича тезкор тушунтиришлар ва амалий таклифлар бермоқда.

Ташриф якунида делегация аъзолари томонидан сармоя киритиш ва ҳамкорликни йўлга қўйиш учун энг мақбул деб топилган мажмуалар танлаб олинади. Шундан сўнг Витебск вилояти ижроия қўмитаси билан биргаликда аниқ инвестиция ва ҳамкорлик лойиҳаларини амалга ошириш бўйича амалий қадамлар белгиланади.