Ўзбекистон тадбиркорлари Беларусьда чорвачилик лойиҳаларини амалга оширишга тайёргарлик кўрмоқда

Тошкент, Ўзбекистон (UzDaily.uz) — Жорий йилнинг 19 март куни Ўзбекистон Савдо-саноат палатаси раиси Даврон Вахабов ҳамда Қашқадарё вилояти ҳокимининг биринчи ўринбосари Улуғбек Узаков раҳбарлигида онлайн мулоқот бўлиб ўтди.

Унда Қашқадарё вилоятида чорвачилик соҳасида фаолият юритаётган ва Беларусь Республикасининг Витебск вилоятида ўз фаолиятини йўлга қўйишни режалаштираётган тадбиркорлар иштирок этди.

Витебск вилоятининг Ушачск, Глубокск ва Шарковщинск туманларида жойлашган, 9 минг гектаргача ер майдонига эга хўжаликларни 90 фоизгача чегирма билан аукцион орқали харид қилиш имконияти бўйича хорижий томон билан келишувга эришилган.

Учрашув давомида Даврон Вахабов мазкур лойиҳанинг аҳамиятига тўхталиб, у Ўзбекистон учун гўшт ва тирик чорва маҳсулотлари импортини диверсификация қилиш, шунингдек янги манбаларни шакллантиришда муҳим ўрин тутишини таъкидлади.

Шунингдек, тадбиркорларга мазкур ер майдонларида чорва учун мустаҳкам озуқа базасини яратиш ҳамда боқиладиган чорва жунини ўзбек тўқимачилик корхоналарига етказиб бериш орқали қўшимча қиймат занжирини шакллантириш таклиф этилди. Ушбу ташаббус иштирокчилар томонидан қўллаб-қувватланди.

Мулоқот якунларига кўра, ўзбек тадбиркорларидан иборат делегация келаси ҳафта бошида Витебск вилоятига ташриф буюриб, таклиф этилаётган хўжаликларни жойига чиқиб ўрганиш ва баҳолашга келишиб олди.