Ўзбекистон Сямен шаҳрида бўлиб ўтаётган CIFIT кўргазмасида инвестиция павильонини тақдим этди

Тошкент, Ўзбекистон (UzDaily.uz) — 8 сентябрь куни Сямен шаҳрида бўлиб ўтаётган 25-Хитой халқаро инвестиция ва савдо ярмаркаси (CIFIT) доирасида “Invest in Uzbekistan” бренди остида Ўзбекистон павилонининг тантанали очилиш маросими бўлиб ўтди.

1997 йилдан буён ҳар йили ўтказиб келинаётган CIFIT — Хитойнинг энг йирик инвестиция ва савдо кўргазмаси ҳисобланади. Жорий йилда унда ўнлаб давлатларнинг вакиллари ҳамда иқтисодиётнинг турли соҳаларини қамраб олган 500 дан ортиқ етакчи хитой компаниялари иштирок этмоқда.

Тўрт кун давомида Ўзбекистон павилони меҳмонларга мамлакатимизнинг қишлоқ хўжалиги, геология, туризм, кимё ва тўқимачилик саноати, шунингдек чарм ҳамда ипакчилик соҳаларидаги инвестиция имкониятларини тақдим этади.

Дастур доирасида тақдимотлар, маҳсулот намойишлари, семинарлар ҳамда ўзбек ва хитой тадбиркорлари иштирокида бизнес-форум ташкил этилиши режалаштирилган. Бундан ташқари, икки томонлама ҳамкорликни кенгайтириш ва инвестицияларни жалб этишга қаратилган G2G2, G2B ва B2B форматидаги учрашувлар ўтказилиши кўзда тутилган.