Тошкент, Ўзбекистон (UzDaily.uz) — Жорий йилнинг 4 март куни Братислава шаҳрида Ўзбекистон Савдо-саноат палатаси раиси ўринбосари Дилшод Расулов ва Словакия Савдо-саноат палатаси раиси Петер Михок ўртасида учрашув ўтказилди.

Словакия Савдо-саноат палатаси (SCCI) – Словакия Республикасининг етакчи бизнес уюшмаларидан бири бўлиб, 1992 йилда ташкил этилган. Палата маҳаллий ва халқаро тадбиркорликни ривожлантириш, бизнес муҳитини яхшилаш ҳамда савдо ва инвестиция жараёнларини қўллаб-қувватлашга қаратилган фаолият олиб боради.

Учрашувда Ўзбекистон ва Словакия ўртасида савдо-иқтисодий ва инвестициявий ҳамкорликни ривожлантириш масалалари муҳокама қилинди. Хусусан, жорий йилнинг апрель ойида Словакия ишбилармон доиралари делегациясининг Ўзбекистонга ташрифини ташкил этиш, шунингдек, бизнес-форум ва B2B учрашувлар ўтказиш бўйича келишувга эришилди.

Учрашув якунлари бўйича томонлар ўртасида англашув меморандуми ва Ўзбекистон-Словакия Ишбилармонлар кенгашини ташкил этиш тўғрисида келишув имзоланди. Бу ҳамкорлик икки мамлакат тадбиркорлари учун янги имкониятлар эшигини очиб, ўзаро инвестициявий лойиҳаларни амалга оширишга мустаҳкам асос бўлади.