Тошкент, Ўзбекистон (UzDaily.uz) — Макка шаҳрида бўлиб ўтаётган “Makkah Halal Forum 2025” доирасида Ўзбекистон Савдо-саноат палатаси раиси биринчи ўринбосари Д.Курбанов Ислом савдо ва ривожланиш палатаси (ICCD) Бош котиби Юсуф Халавий билан икки томонлама учрашув ўтказди.

Учрашувда Ўзбекистоннинг ICCD билан ҳамкорлигини янада кенгайтириш, ислом мамлакатлари билан савдо-иқтисодий алоқаларни ривожлантириш ҳамда Палата имкониятларидан самарали фойдаланиш масалалари муҳокама қилинди.

ICCD Бош котиби палатанинг жорий фаолияти, истиқболдаги режалари ва ислом давлатлари ўртасидаги савдо-иқтисодий ҳамкорликни ривожлантириш бўйича амалга оширилаётган лойиҳалар тўғрисида батафсил маълумот берди.

Музокаралар давомида ўзаро савдо ҳажмини ошириш, ҳалол индустриясини ривожлантириш, ислом молияси соҳасидаги ҳамкорликни кучайтириш йўналишлари бўйича ҳамкорликни кенгайтириш масалалари кўриб чиқилди.

Ўзбекистон Савдо-саноат палатаси вакиллари мамлакатимизнинг инвестиция муҳити, экспорт салоҳияти ва тадбиркорликни ривожлантириш бўйича олиб борилаётган ислоҳотлар тўғрисида ахборот берди.

Музокаралар якунида томонлар ICCD ва Ўзбекистон ўртасида ҳамкорлик меморандумини имзолаш, қўшма бизнес-форумлар ва савдо миссияларини ташкил этиш, ўзаро тажриба алмашиш ва мутахассислар малакасини ошириш дастурларини йўлга қўйиш бўйича ўзаро келишувга эришдилар.