Тошкент, Ўзбекистон (UzDaily.uz) — Ўзбекистон Савдо-саноат палатаси раисининг биринчи ўринбосари Давронбек Қурбонов раҳбарлигидаги делегация Вена шаҳрида хизмат сафари доирасида Австрия Иқтисодий палатасининг Осиё давлатлари билан ишлаш департаменти директори Стефан Стантейский билан учрашув ўтказди.

Австрия Иқтисодий палатаси 1839 йилда ташкил этилган бўлиб, мамлакатда фаолият юритадиган барча тадбиркорлик субъектлари унга мажбурий равишда аъзо ҳисобланади.

Бугунги кунда палатада 600 мингдан ортиқ тадбиркорлик субъектлари рўйхатдан ўтган, уларнинг йиллик товар айланмаси эса 521 млрд АҚШ долларини ташкил этади.

Ташкилот дунёнинг 100 дан зиёд давлатларида савдо ваколатхоналарига эга ва 2024 йилда Ўзбекистонда ҳам ўз ваколатхонасини очган.

Учрашувда икки томонлама ҳамкорликни янги босқичга олиб чиқиш масалалари муҳокама қилинди. Хусусан, Стефан Стантейский томонидан Австрияда Ўзбекистон Савдо-саноат палатаси ваколатхонасини очиш ҳамда Вена шаҳрида Ўзбекистон–Австрия бизнес форумини ўтказиш таклифи илгари сурилди.

Шунингдек, иқтисодиёт, савдо ва инвестиция алоқаларини янада ривожлантириш, стартап лойиҳаларини биргаликда амалга ошириш ҳамкорликнинг истиқболли йўналишлари сифатида белгилаб олинди.

Учрашув самимий ва ишончли руҳда ўтиб, томонлар белгиланган мақсадларга эришиш йўлида доимий мулоқот ва амалий ҳамкорликни давом эттиришга келишиб олдилар.