Ўзбекистон Савдо-саноат палатаси савдони рақамлаштириш ва МДҲ давлатларининг қўшма ташаббусларини муҳокама қилди

Тошкент, Ўзбекистон (UzDaily.uz) — Ўзбекистон Савдо-саноат палатаси МДҲга аъзо давлатлар савдо-саноат палаталари раҳбарларининг видеоконференция шаклида бўлиб ўтган йиғилишида иштирок этди. Тадбир Тожикистон Савдо-саноат палатаси раислигида ўтказилди.

Йиғилишда Тожикистон, Беларусь, Россия ва Ўзбекистон савдо-саноат палаталари вакиллари қутлов сўзлари билан чиқиш қилди. Ўзбекистон томонидан тадбирда Савдо-саноат палатаси раисининг ташқи иқтисодий фаолият бўйича маслаҳатчиси Алишер Шайхов иштирок этди.

Йиғилиш давомида инновацион ҳамкорликни ривожлантириш, савдо жараёнларини рақамлаштириш, товарлар келиб чиқиши сертификатларини электрон тарзда юритиш, маҳсулотларни маркировка қилиш ва идентификациялаш, шунингдек МДҲ мамлакатлари ўртасида кўргазма-ярмарка фаолиятини кенгайтириш масалалари муҳокама қилинди.

Ўзбекистон ССП вакиллари савдо жараёнларини янада соддалаштириш, техник талабларни мувофиқлаштириш, электрон ҳужжатларни ўзаро тан олиш механизмларини ривожлантириш ва бизнес тузилмалар ўртасидаги ҳамкорликни кучайтириш зарурлигини таъкидладилар.

Шунингдек, Ўзбекистоннинг минтақавий экспорт салоҳиятини ошириш ва давлатлар палаталари ўртасидаги ҳамкорликни мустаҳкамлашга қаратилган халқаро қўшма ташаббусларда фаол иштирок этишга тайёрлиги қайд этилди.

Йиғилиш якунида 2026 йилда қўшма ташаббусларни амалга ошириш ва ҳамкорликни янада ривожлантириш бўйича чора-тадбирлар белгилаб олинди.