Ўзбекистон рекорд даражадаги олтин нархлари фонида олтин экспортини тўхтатишни узайтирди

Тошкент, Ўзбекистон (UzDaily.uz) — Ўзбекистон жаҳон бозорида олтин нархлари тарихий юқори даражага чиққан шароитда олтин экспортидаги танаффусни узайтирди, деб хабар қилади Bloomberg. Қайд этилишича, йиллик қазиб олиш ҳажми тахминан 130 тоннани ташкил этувчи ва дунёдаги йирик олтин ишлаб чиқарувчилардан бири ҳисобланган мамлакат глобал геосиёсий беқарорликни инобатга олган ҳолда метални жамғариш стратегиясига ўтган.

Монетар бўлмаган олтин экспорти амалда ўтган йил ноябр ойидан бери тўхтатилган бўлиб, ноябрдан январга қадар бўлган даврда етказиб беришлар умуман амалга оширилмаган. 2025 йил октябрь ойида эса экспорт ҳажмлари энг минимал даражада бўлган. Солиштириш учун, ўтган йил якунларига кўра Ўзбекистон рекорд даражада — 9,9 млрд АҚШ доллари миқдорида олтин экспорт қилган эди.

Ҳимоя активи сифатида олтин қийматининг ўсиши Яқин Шарқдаги вазиятнинг кескинлашуви билан боғлиқ. Ўзбекистон Марказий банки вакили олтин бўйича операцияларни амалга ошириш ҳақидаги қарорлар жорий бозор конъюнктурасини ҳисобга олган ҳолда қабул қилинаётганини таъкидлаб, экспортни қайта тиклашнинг эҳтимолий муддатлари ҳозирча белгиланмаганини билдирди. Мутахассислар бундай ёндашув металл нархларининг янада ошиши кутилмаётганини англатиши мумкинлигини қайд этмоқда.

Экспорт тўхтатилиши билан бир вақтда мамлакат халқаро захираларни фаол равишда ошириб бормоқда. Ўтган йили Ўзбекистон Марказий банки олтин харид қилувчи дунёдаги энг йирик ўнта харидор қаторига кирди. Январ ойида умумий захиралар қарийб 18 фоизга ошиб, 65 млрд АҚШ долларига етди, улар таркибида олтин улуши эса 86 фоиздан ошди. Бу жорий макроиқтисодий шароитда ҳимоя активларига алоҳида эътибор қаратилганини кўрсатади.