Ўзбекистон Қурилиш ва уй-жой-коммунал хўжалиги вазирлиги 9 мингта носоз лифт ҳақидаги хабарларни рад этди

Тошкент, Ўзбекистон (UzDaily.uz) — Қурилиш ва уй-жой-коммунал хўжалиги вазирлиги Тошкент шаҳрида 9 мингдан ортиқ носоз лифт аниқлангани ҳақида тарқалган хабарларни инкор этди.

Вазирлик маълумотларига кўра, республика бўйича 5 491 та кўп квартирали уйда 13 798 та лифт ускуна мавжуд бўлиб, шундан 12 987 таси одам ташиш, 811 таси эса юк ташиш учун мўлжалланган.

Тошкент шаҳрида 3 245 та кўп квартирали уйда жами 9 144 та лифт мавжуд. Шулардан 1 835 тасининг эксплуатация муддати тугаган, уларни янгилаш ишлари Вазирлар Маҳкамасининг 2025 йил 17 февралдаги 98-сон қарори асосида 2025-2028 йиллар давомида босқичма-босқич амалга оширилмоқда. 2025 йилда 452 та лифтни янгилаш ишлари якунланмоқда.

Шу билан бирга Вазирлар Маҳкамасининг 2017 йил 6-октабрдаги 801-сон қарорига мувофиқ мамлакатдаги барча лифтлар ҳар йили мажбурий техник кўрикдан ўтказилади.

2025 йил 1 майдан бошлаб мамлакатда “Хавфсиз лифт” ягона идоралараро электрон платформаси иш бошлаган бўлиб, у кўп қаватли уйлардаги лифт ускуналарининг ҳолатини реал вақт режимида мониторинг қилиш имконини беради.

Шунингдек, тизим орқали фуқаролар лифтларнинг хизмат кўрсатилиши ва техник ҳолати ҳақида долзарб маълумотларни олишлари мумкин.

Вазирлик таъкидлаганидек, техник кўрик давомида аниқланган камчиликлар лифтнинг ишдан чиққанини англатмайди. Бундай текширувлар профилактик назоратнинг бир қисми бўлиб, хавфсиз ва ишончли фойдаланишни таъминлашга қаратилган.

«Вазирлик лифтлар фаолиятини доимий равишда мониторинг қилиб боради ва соҳадаги эҳтимолий муаммоларнинг олдини олиш мақсадида зарур чораларни кўришни давом эттиради», — дейилади вазирлик хабарномасида.