Ўзбекистон қишлоқ хўжалигига Туркия инвестицияларини жалб қилмоқда

Тошкент, Ўзбекистон (UzDaily.uz) — Қишлоқ хўжалиги вазирлиги бошқарма бошлиғи Шохрух Акрамов бошчилигидаги делегация Туркия Республикасига хизмат сафари доирасида мамлакатимизга инвестиция киритиш истагида бўлган бир қатор етакчи турк компаниялари раҳбарлари билан қатор учрашувлар ўтказди.

Хусусан, Анқара шаҳрида жойлашган ва қишлоқ хўжалиги агрегатлари ишлаб чиқаришга ихтисослашган “Farmer Ziraat” корхонаси раҳбарияти билан ўтказилган учрашувда компаниянинг ишлаб чиқариш қувватларини Ўзбекистонда ташкил этиш масалалари муҳокама қилинди.

Учрашув давомида вазирлик вакиллари томонидан мамлакатимизда хорижий инвесторлар учун яратилган қулай инвестициявий муҳит, солиқ ва божхона имтиёзлари, шунингдек, давлат томонидан кўрсатиладиган қўллаб-қувватлаш механизмлари ҳақида батафсил маълумот берилди.

Шунингдек, Туркия Уруғчилик Уюшмаси — TURKTOB Бош котиби Муҳтеşэм Торун билан бўлиб ўтган учрашувда уруғчилик соҳасида ҳамкорликни кенгайтириш, тажриба алмашиш ҳамда замонавий технологияларни Ўзбекистонда жорий этиш масалалари юзасидан музокаралар олиб борилди.

Туркиядаги Қишлоқ хўжалиги техникалари ва машинасозлик саноатчилари уюшмаси —TARMAKBİR раиси Ҳаккı Экинç Эргüнеş билан бўлиб ўтган учрашувда қишлоқ хўжалиги техникалари, ақлли қишлоқ хўжалиги технологиялари ҳамда дронлар ишлаб чиқаришга ихтисослашган турк компанияларини Ўзбекистонга жалб этиш, шунингдек, ушбу йўналишларда қўшма ишлаб чиқаришни йўлга қўйиш бўйича аниқ келишувларга эришилди.