Тошкент, Ўзбекистон (UzDaily.uz) — Қишлоқ хўжалиги вазирлиги Сурхондарё вилояти ва яқин ҳудудлар бозорларида кузатилаётган пиёз нархи ошиши бўйича изоҳ берди. Фойдаланувчилар маълумотига кўра, янги ҳосил пиёзи нархи ўтган йилги нархлардан анча фарқ қилмоқда.

Вазирлик маълумотига кўра, 2024 йил май–июнь ойларида пиёз нархининг 500–1000 сўмгача тушиб кетгани сабабли айрим ҳудудларда ушбу маҳсулот экиладиган майдонлар қисқартирилган. Шунга қарамасдан, жорий йилда республика бўйича 1 412 000 тонна пиёз етиштирилиши кутилмоқда — бу 2024 йилга нисбатан 12 000 тоннага кўп.

Вазирликка кўра, 1 апрель ҳолатига пиёз нархи 7–8 минг сўмни ташкил этган бўлса, сўнгги кунларда 4–5 минг сўмгача тушган. «Пиёзнинг етилиш муддатига мувофиқ, жорий йил 15 апрелдан бошлаб пиёз нархи 2–2,5 минг сўмга тушиши кутилмоқда», — дейилади хабарда.

Бундан ташқари, Қишлоқ хўжалиги вазирлиги ҳар бир қишлоқ хўжалиги мавсуми бошида биринчи чиқарилган маҳсулотга нарх муваққатан ошиб кетишини таъкидлади. Бу фермерлар томонидан маҳсулотни 10–15 кун аввал етиштириш учун қўлланилган инновацион агротехник усулларга қилинган харажатлар билан боғлиқ.