Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев мамлакат миллий футбол терма жамоасини 2026 йилги жаҳон чемпионатининг финал босқичига чиққани муносабати билан табриклади. Давлат раҳбари бу ғалабани ҳақиқий тарихий воқелик деб атади.

«Осиёнинг кучли жамоалари билан кескин курашда сиз ҳақиқий характер, сўлмас ирода ва юксак профессионализмни намоён этдингиз. Ўзбекистон мустақиллик тарихи давомида илк бор жаҳон чемпионати йўлланмасига эга бўлди. Бу буюк ғалаба билан сизларни чин қалбимдан табриклайман», — дейилади Президент мурожаатида.

Президент бу натижа миллий спорт солномасига ёрқин ютуқ сифатида кириши ва футболга садоқатли миллионлаб юртдошлар орзусининг рўёбига айланганини таъкидлади.

«Сизлар меҳнат, иқтидор, маҳоратингиз ва энг муҳими, муваффақиятга бўлган мустаҳкам ишончингиз билан халқимиз йиллар давомида орзу қилган натижага эришдингиз», — деди у.

Давлат раҳбари ушбу ютуқни Янги Ўзбекистон ёш авлодининг улкан салоҳияти ва мамлакатимизда оммавий спорт, хусусан, футбол соҳасига қаратилган давлат эътиборининг самараси деб таърифлади.

«Сизнинг ушбу нуфузли мусобақага чиқишингиз — нафaқат спорт соҳасидаги ютуқ, балки юртимизда жисмоний тарбия ва спортни ривожлантиришга берилган устувор аҳамиятнинг амалий ифодасидир», — деди Президент.

Шунингдек, у ушбу зафар минглаб ёшлар учун илҳом манбаи бўлишини ва Ўзбекистоннинг халқаро нуфузини янада мустаҳкамлашга хизмат қилишини билдирди.

«Ишонаманки, халқимизнинг қўллаб-қувватловини ҳис этган ҳолда, бутун Марказий Осиё минтақасини намоён этиш масъулияти ва шарафини англаб, Сизлар АҚШ, Мексика ва Канадада бўлиб ўтадиган жаҳон чемпионатида муносиб иштирок этасиз», — деди Шавкат Мирзиёев.

Давлат раҳбари жамоа мураббийлар штаби, футболчиларнинг ота-оналари ва яқинларига ҳам миннатдорлик билдирди. «Жамоамизни ҳар бир босқичда ишониб, дуо қилиб қўллаб-қувватлаган барча азизларга чуқур миннатдорлик изҳор этаман», — деди у.

«Курбон ҳайити каби муборак кунларда халқимизга бағишланган бу тарихий, унутилмас зафар билан барчангизни яна бир бор табриклайман. Ғалабалар йўлида тўхтаб қолманг, азиз фарзандларим!» — дея Президент ўз табригига якун ясади.

Эслатиб ўтамиз, 5 июнь куни Абу-Дабидаги «Аль-Наҳйян» стадионида бўлиб ўтган учрашувда Ўзбекистон терма жамоаси БААга қарши 0:0 ҳисобида дуранг ўйнади. Бу натижа жамоага «А» гуруҳида 2-ўринни мустаҳкамлаб, жаҳон чемпионати йўлланмасини расман таъминлаш имконини берди.

Шу тариқа, Ўзбекистон жаҳон чемпионати финалига чиққан Марказий Осиёдаги биринчи мамлакатга айланди. Терма жамоа мураббийи Темур Кападзе мамлакат тарихида Олимпия терма жамоасини Олимпиадага ва миллий жамоани мундиалга олиб чиққан илк мутахассис сифатида тарихга кирди.

Тўққиз турдан сўнг Ўзбекистон жамоаси 18 очко билан гуруҳда иккинчи ўринни эгаллаб турибди. Биринчи ўринда — 20 очкога эга Эрон. Улардан кейин БАА (14 очко), Қатар (10), Қирғизистон (6) ва КХДР (2) жойлашган. Ўзбекистон сўнгги ўйинини 10 июнь куни Қатарга қарши Тошкентда ўтказади.