Ўзбекистон Полша ва Чехия билан қишлоқ хўжалиги соҳасида илмий-техник ҳамкорликни ривожлантириш масалаларини муҳокама қилмоқда

Тошкент, Ўзбекистон (UzDaily.uz) — 18-Берлин қишлоқ хўжалиги вазирлари конференцияси доирасида Ўзбекистон, Полша ва Чехия вакиллари ўртасида қишлоқ хўжалиги соҳасидаги ҳамкорликни кенгайтиришга қаратилган муҳим учрашувлар бўлиб ўтди.

Хусусан, Ўзбекистон Қишлоқ хўжалиги вазири ўринбосари Алишер Шукуров Полша Давлат котиби Жасек Сзерниак ҳамда Чехия қишлоқ хўжалиги вазири ўринбосари Жиндřич Фиалка билан икки томонлама мулоқотлар ўтказди.

Учрашувларда таълим ва илм-фан соҳаларидаги ҳамкорликни кенгайтириш, илмий-тадқиқот институтлари ва олий таълим муассасалари ўртасида қўшма лойиҳаларни ривожлантириш масалалари муҳокама марказида бўлди. Томонлар илмий салоҳиятни бирлаштириш орқали замонавий ечимларни амалиётга жорий этиш муҳимлигини алоҳида таъкидладилар.

Шунингдек, рақамли технологиялар, “ақлли қишлоқ хўжалиги” ечимлари, ветеринария ва карантин тизимларини такомиллаштириш, шунингдек халқаро стандартларга мувофиқликни таъминлаш масалалари юзасидан атрофлича фикр алмашилди.

Мулоқотлар давомида инновацион тажрибаларни ўзаро алмашиш, илғор технологияларни жорий этиш ҳамда қишлоқ хўжалиги маҳсулотлари экспорт-импорт жараёнларини ривожлантириш орқали ўзаро манфаатли ҳамкорликни мустаҳкамлаш масалаларига алоҳида эътибор қаратилди.

Мазкур учрашувлар Ўзбекистон ва Европа мамлакатлари ўртасидаги аграр ҳамкорликни янги босқичга олиб чиқиш, истиқболда қўшма лойиҳалар кўламини кенгайтириш йўлидаги муҳим ва амалий қадам сифатида баҳоланди.