Ўзбекистон Polpharma билан фармацевтика соҳасида ҳамкорликни муҳокама қилди

Тошкент, Ўзбекистон (UzDaily.uz) — 14 ноябрь куни ИССВ раҳбари Лазиз Кудратов видеоконференция тарзида «Polpharma» компанияси эгаси Жезҳи Старак билан учрашди. Музокараларда "Polpharma Group" раҳбарияти ва Ўзбекистон фармацевтика соҳаси вакиллари иштирок этди.

Томонлар фармацевтика соҳасидаги ҳамкорлик истиқболлари, юқори қўшилган қийматга эга лойиҳаларни ривожлантириш, ишлаб чиқаришни маҳаллийлаштириш, илмий-тадқиқот ҳамкорлигини кенгайтириш, кадрлар тайёрлаш ва тажриба алмашиш масалаларини батафсил муҳокама қилдилар.

Полша томони Ўзбекистонда жорий этилаётган халқаро стандартларни, жумладан WHO Listed Authorities (WLA) тизимини юқори баҳолади. Мазкур тизим маҳаллий ишлаб чиқарувчиларга глобал бозорларга чиқиш имкониятини кенгайтиради, экспорт салоҳиятини оширади ва тартибга солиш жараёнларининг уйғунлашувига кўмаклашади.

Музокаралар конструктив руҳда ўтди. Инвестиция лойиҳаларини амалга ошириш, ишлаб чиқаришни ривожлантириш ҳамда илмий-тадқиқот ва ишланмалар соҳасида ҳамкорликни давом эттиришга қатъий интилиш тасдиқланди.

Polpharma Group - Марказий ва Шарқий Европадаги йирик фармацевтика ишлаб чиқарувчиларидан бири бўлиб, рецепт бўйича ва рецептсиз дори воситалари, фаол фармацевтик ингредиентлар ишлаб чиқаради, шунингдек, ўзига хос илмий-тадқиқот марказлари ва замонавий ишлаб чиқариш мажмуаларига эга.