Ўзбекистон парламенти делегацияси Ашхободда Гендер тенглик масалалари бўйича парламентлараро мулоқотда иштирок этди

Тошкент, Ўзбекистон (UzDaily.uz) — Жорий йил 26 март куни Олий Мажлис Сенатининг Ёшлар, хотин-қизлар, маданият ва спорт масалалари қўмитаси раиси Орзигул Қозихонова бошчилигидаги Ўзбекистон парламенти делегацияси Ашхобод шаҳрида гендер тенгликни таъминлаш ва гендер асосидаги зўравонликка қарши курашиш соҳасида қонунчилик асосларини мустаҳкамлашга бағишланган парламентлараро мулоқотда иштирок этди.

Тадбир Туркманистон Мажлиси томонидан БМТнинг Аҳолишунослик жамғармаси (UNFPA) билан ҳамкорликда халқаро ташкилотлар ва саккиз давлат парламентлари вакиллари иштирокида ташкил этилди.

Мулоқот давомида Ўзбекистон делегацияси аъзолари хотин-қизлар ҳуқуқларини таъминлаш бўйича қонунчилик ва институционал механизмларни такомиллаштириш бўйича миллий тажрибани тақдим этди, бунда гендер асосидаги зўравонликнинг олдини олиш ва унга қарши курашиш масалаларига алоҳида эътибор қаратилди.

Замонавий таҳдидларга, шу жумладан, кибербуллинг, онлайн таҳдидлар ва психологик босим каби зўравонликнинг янги шакллари тарқалишига қарши самарали жавобларни ишлаб чиқиш зарурлигига алоҳида эътибор қаратилди. Қонунчиликни янада мослаштириш, рақамли ҳимоя воситаларини қўллашни кенгайтириш, шунингдек, парламентларнинг бу борадаги ролини кучайтириш муҳимлиги қайд этилди.

Бундан ташқари, Ўзбекистон делегацияси мамлакатимизда хотин-қизлар ва болаларни ҳимоя қилиш тизимини кучайтириш, ижтимоий қўллаб-қувватлаш механизмларини ривожлантириш ва зўравонликнинг олдини олиш мақсадида идоралараро ҳамкорлик самарадорлигини оширишга қаратилган кенг кўламли ислоҳотлар ҳақида хабардор қилди.