Ўзбекистон «ўртача эркин» иқтисодиётлар қаторига кирди

Тошкент, Ўзбекистон (UzDaily.uz) — Ўзбекистон 2026 йил учун тайёрланган Index of Economic Freedom жаҳон рейтингида 86-ўринни эгаллади. Рейтинг The Heritage Foundation томонидан тайёрланган бўлиб, мамлакат 60,3 балл тўплади ва ўтган йилга нисбатан натижасини 2,3 пунктга яхшилади. Шунинг натижасида Ўзбекистон илк бор «ўртача эркин» иқтисодиётлар тоифасига кирди.

Индекс натижалари Ўзбекистон кўрсаткичлари жаҳон ўртача даражасидан юқори эканини кўрсатди, бу кўрсаткич 59,9 баллни ташкил этади.

Мамлакат энг юқори натижаларни иқтисодиётнинг очиқлиги соҳасида намоён этди: Trade Freedom индекси 80,6 баллга, Investment Freedom эса 70,0 баллга етди, бу жаҳон ўртача кўрсаткичларидан анча юқори.

Рейтингдаги ўсиш асосий иқтисодий кўрсаткичларнинг яхшиланиши билан ҳамоҳанг бўлди.

Мамлакатнинг ташқи савдо айланмаси 2023 йилдаги 63,5 млрд доллардан 2025 йилда 81,2 млрд долларга етди, экспорт ҳажми эса 24,9 млрд доллардан 33,8 млрд долларга ошди. Шу билан бирга, асосий капиталга йўналтирилган хорижий инвестициялар ва кредитлар ҳажми икки баравардан ортиқ кўпайиб, 422,1 трлн сўмга етди.